«Yevrovideniye-2016» qo‘shiq tanlovining teletomoshabinlar tomonidan ovoz berilishi yakunlariga ko‘ra, Ukraina Rossiya vakili Sergey Lazarevga maksimal 12 ball bergan. Rossiyalik teletomoshabinlar ham Ukraina vakili uchun 10 ball qo‘ygan. Bu ma'lumotlar tanlovning rasmiy ilovasida keltirilgan.

Ilovada ko‘rinishicha, ukrainaliklar Ozarbayjonga 10, Polshaga 8 ball berishgan.

Qayd etish kerakki, undan oldinroq hakamlar tomonidan ovoz berilish jarayonida Ukraina vakili Litvaga maksimal ball qo‘ygan, Belgiyaga 10, Latviyaga 8. Rossiyaga ukrainalik hakam tomonidan 1 ball ham berilmagandi.

Rossiyalik teletomoshabinlar Armaniston vakiliga 12 ball, Avstriya vakiliga esa 8 ball bergan.

Rossiyalik hakam Armaniston vakiliga 12 ball, Ozarbayjon vakiliga esa 10 ball, Malta vakiliga 8 ball bergan. Ukraina vakili rossiyalik hakamdan 1 ball ham olmagan.

Hakamlar baholashlari bo‘yicha, 26ta davlatning 4tasi Rossiyaga maksimal ball qo‘ygan - Ozarbayjon, Belarus, Kipr va Gretsiya. Rossiyaga Avstriya 3, San-Marino 7, Ispaniya 4, Fransiya 1, Armaniston 2, Bolgariya 6, Latviya 7, Xorvatiya 6, Serbiya 1, Albaniya 7, Chernogoriya 8 ball bergan. Islandiya, Chexiya, Irlandiya, Gruziya, Malta, Finlyandiya, Daniya, Niderlandiya, Isroil, Germaniya, Norvegiya, Avstraliya,  Buyuk Britaniya, Litva, Makedoniya, Estoniya, Italiya, Ukraina, Polsha, Sloveniya va Shvetsiya hakamlari esa Rossiyaga ball bermagan.

Ukraina vakili Jamala muxlislar ovoz berishiga ko‘ra ikkinchi o‘rinni egalladi, ammo unga 26ta davlatning 9tasida 12 balldan qo‘yishdi (San-Marino, Gruziya, Daniya, Moldaviya, Latviya, Isroil, Serbiya, Polsha, Sloveniya).