“Universida – 2016” sport o‘yinlari munosabati bilan Farg‘ona viloyatida keng ko‘lamli obodonlashtirish, bunyodkorlik ishlari amalga oshirilmoqda. Jumladan, yangi sport inshootlari barpo etilib, ko‘plab sport majmualari ta'mirlandi. Farg‘ona shahrida yopiq suv sporti saroyi foydalanishga topshirildi. Farg‘ona davlat universitetida sport-sog‘lomlashtirish majmuasi qad rostladi. Farg‘ona Olimpiya zaxiralari kollejining sport zallari ham ta'mirdan chiqarildi. Bu haqda “O‘zA” xabar bermoqda.

Farg‘ona politexnika institutining 4 talabalar turar joyi va 600 o‘rinli oshxonasida qayta ta'mirlash ishlari amalga oshirildi. Ko‘kalamzorlashtirish ishlari doirasida 1400 dan ortiq tup ko‘chat o‘tqazilib, archa, kashtan, hind sireni, farbitsiya singari manzarali va butasimon daraxtlarga uyg‘un holda ravon yo‘laklar barpo etildi. 

Ayni paytda viloyat terma jamoasi final bosqichiga qizg‘in tayyorgarlik ko‘rmoqda. 

“Universiada – 2016” tashkilotchilari tomonidan talabalarning bo‘sh vaqtini mazmunli o‘tkazishi uchun sharoit yaratishga ham alohida tayyorgarlik ko‘rilmoqda. Jumladan, musobaqa qatnashchilari uchun konsert dasturlari namoyish etiladi, madaniy-ma'rifiy tadbirlar uyushtirilib, diqqatga sazovor joylarga sayohatlar tashkil qilinadi.