AQSh kongressi kompyuter tizimi xakerlar tomonidan hujumga uchradi, deb yozmoqda Intercept.
Xakerlar kongress tizimiga kirib, kompyuterlarning ichidagi ma'lumotlarni shifrlab, so‘ngra bloklangan fayllarga kirish uchun pul talab qilmoqchi bo‘lganlar.
"Oxirgi 48 soat ichida vakillar palatasi axborot xavfsizligi bo‘limida palata tarmog‘iga YahooMail va Gmail pochta dasturlarini qo‘llash bilan uchinchi tomonlar tomonidan hujumlar amalga oshirilgani qayd qilindi", deyilmoqda xabarda.
Nashr ma'lumotlariga ko‘ra, xakerlar palata xodimlariga tanishlari nomidan xat yuborishgan va "zararlangan" dasturni yuklashni taklif qilishgan. Agar foydalanuvchi xatdagi havolaga kirsa, virus ishga tushib, kompyuterdagi barcha fayllarni shifrlab qo‘ygan.
Vakillar palatasida kompyuter hujumlari borasida tafsilotlar berilmadi. AQSh senatida ma'lumotlarga kirishni bloklash holatlari qayd qilinmagan.
