Karnegi-Mellon universiteti olimlari aqlli-soatlarni boshqarish imkonini beruvchi uzuk yasash bo‘yicha SkinTrack loyihasi ustida ish olib bormoqda, deb yozadi MIT Technology Review.

Mazkur uzuk, qo‘l terisini aqlli-soatlar uchun sezgir ekranga aylantirish imkonini beradi. Uning ishlash texnologiyasiga ko‘ra, foydalanuvchi uzuk taqqan qo‘lini boshqa qo‘li yuzasida sirpantirsa, uzuk signalni aqlli-soatga yuboradi.

Ma'lumki, aqlli soatlar ekranlari birmuncha kichik bo‘lgani bois qurilmadan foydalanish qiyinchilik tug‘diradi. Universitet tadqiqotchilarining aytishicha, sezgir ekran maydonini bilak hisobiga kengaytirish mumkin. Bu, o‘z navbatida, aqlli-soatlar yordamida bajariladigan ko‘plab vazifalarni qulaylashtiradi.

Texnologiya ishlab chiqaruvchilari tez orada ushbu ishlanma xususida to‘liqroq hisobotni e'lon qilmoqchi. Hozircha qurilmaning ishlash usuliga oydinlik kirituvchi demovideo namoyish etilgan.