Rossiya prezidenti Vladimir Putin O‘zbekiston rahbari Islom Karimovni Moskvada kutadi. Bu haqda u xorij davlatlari elchilaridan ishonch yorliqlarini qabul qilib olish marosimida ma'lum qilgan.

Bugungi marosimda O‘zbekistonning Rossiyadagi elchisi Bahrom Ashrafxonov Rossiya prezidenti Vladimir Putinga ishonch yorlig‘ini topshirgan.

Yorliqni qabul qilar ekan, Vladimir Putin Rossiyada O‘zbekiston bilan «yaqin ittifoqchilik ruhida kechayotgan» munosabatlar yuqori baholanishini ta'kidlab o‘tdi

U O‘zbekiston Prezidenti Islom Karimovning 25-26 aprel kunlari Rossiya Federatsiyasiga qiladigan rasmiy tashrifi ikki tomonlama munosabatlarni yanada chuqurlashtirishiga ishonch bildirdi.

Putin Rossiya Toshkentning Shanxay hamkorlik tashkiloti raisi sifatida o‘tgan yili Ufada o‘tkazilgan ShHT sammitida qabul qilingan qarorlar, jumladan, tashkilot tarkibini kengaytirish bo‘yicha olib borayotgan ishlarini qo‘llab-quvvatlashini ham qayd etib o‘tdi.

Bundan avvalroq, Islom Karimov 25 aprel kuni harbiy jo‘natmalar masalasini muhokama qilish uchun Moskvaga borishi haqida xabar qilingandi.