Jahon banki ekspertlari rubl kursi yanada pasayishini bashorat qilishmoqda. Bu haqda bankning Rossiya bo‘yicha bosh mutaxassisi Birjit Hanzlga asoslanib Rambler News Service xabar tarqatgan.

"Biz hisob-kitoblarimizda rublning hozirgidan ko‘ra kuchliroq qadrsizlanishini taxmin qilamiz", -deya uning so‘zlarini keltiradi axborot agentligi.

Shu bilan birgalikda, Xalqaro moliya tashkiloti vakili Hanzl 2017 yilda rubl kursi ko‘tarilishini bashorat qilgan bo‘lsada, aniq raqamlarga to‘xtalmagan.

7 aprel uchun rublning rasmiy kursi bir dollar— 68,52 rubl, bir yevro — 77,81 rubl sifatida belgilangan.

Bundan avval, 23 mart kuni Rossiya bosh vazir o‘rinbosari Arkadiy Dvorkovich rublning zaiflashuvi Rossiya iqtisodiyotining barqarorlashuviga yordam berayotgani hamda eksport qiluvchilarni qo‘llab-quvvatlayotganini aytgan edi.

18 mart kuni Rossiya banki (Markaziy bank) raisi Elvira Nabiullina ham shu mazmunda bayonot bergandi.

Uning fikricha, Rossiya iqtisodiyoti rublning suzuvchi kursi yordamida zamonga tezroq moslashgan.