Buyuk Britaniya fuqarosi, Esseks grafligidagi Chelmsford shahrida yashovchi Aleks Keviyel o‘z do‘sti bilan mahalliy pablardan biriga kirgach, boshqa mamlakatda uyg‘ondi. U ertalab Ispaniyaning Barselona shahrida ko‘zini ochganida hayron bo‘lib qolgan.

"Men hech qachon piyonista bo‘lmaganman, lekin bu safar butun kecha davomida ichib chiqishga ahd qilgandim. Biz barga kirib 90 funt evaziga ichimlik buyurtma qildik. Bu juda o‘tkir ichimlik ekan", deya Keviyelning so‘zlarini keltiradi Metro nashri.

Ma'lum bo‘lishicha, u chekish uchun tashqariga chiqqach, g‘oyib bo‘lib qolgan. U ko‘chada turganida avtobusni ko‘rib qolgan va unga chiqqan. Bu avtobus esa uni aeroportga eltgan. Aleks bu ishlar tushda bo‘layotgani kabi harakatlangan va Ispaniyaga uchuvchi reys uchun chipta sotib olgan va samolyotga chiqqan. U bu jarayon davomida bir necha suratlar ham olgan.

Britaniyalik bu yigitning ongsiz holatda bu ishlarni qanday amalga oshirgani mavhum bo‘lib qolmoqda.

Ertalab u uyg‘ongach, darhol otasiga telefon qilgan va bu ertaknamo voqea haqida aytib bergan.

Qayd etish kerakki, bunday hodisalar avval ham sodir bo‘lgan.

Bundan oldinroq, Aleksning bir vatandoshi ko‘proq ichib qo‘ygach, Tailandga ketib qolgandi.

Shuningdek, bir shotlandiyalik mast holatda Braziliyaga reys chiptasini xarid qilgani va keyin yarim dunyoni aylanib kelgani voqeasi internetda mashhur bo‘lgandi.