“Jajji akademik” jurnali internet tarmog‘ida “Akademik bolaman” deb nomlangan davomiy tanlovlar boshlanishi haqida xabar bermoqda.

Ijtimoiy tarmoqlarning faol foydalanuvchisi bo‘lgan mashhur o‘zbekistonliklar ham bu ishga o‘z hissalarini qo‘shishni niyat qilishgan. G‘oliblar “Jajji akademik” jurnali uchun 2016 yil oxirigacha obuna hamda “Akademnashr” nashriyoti kitoblariga ega bo‘lishlari mumkin.

“Har bir bola bir nihol. Ota-onalar esa bu niholning kelajakda gurkirab o‘sishi uchun mas'ul bo‘lgan shaxslardir. Shuning uchun ham ushbu tanlovlarga farzandi kelajagiga befarq bo‘lmagan ota-onalarni jalb qilishga harakat qilamiz. Chunki avvalo ular “Jajji akademik” jurnali bilan do‘st bo‘lgan bolalar kelajakda o‘z oilasi uchun ham, vatani uchun ham foyda keltira oladigan, ilm va ma'rifatga muhabbatli bo‘lib voyaga yetishlariga ishonmoqlari lozim”, – deydi jurnal bosh muharriri Xurshidbek Ibrohimov.

Tanlov “Eng yaxshi fotosurat”, “Eng yaxshi ijodkor”, “Eng yaxshi ixtirochi”, “Eng yaxshi chizilgan surat”, “Eng yaxshi insho”, “Jurnal uchun eng yaxshi taklif”, “Bir hafta davomida yig‘ilgan eng ko‘p “a'lo” baho”, “Mening qahramonim” kabi ko‘plab yo‘nalishlarda “Jajji akademik” jurnali hamda mashhur yurtdoshlarimizning Facebook tarmog‘idagi sahifalarida o‘tkaziladi. Ishtirokchilardan jurnal sahifasiga "yoqtirish" tugmasini bosish hamda qiziqarli shartlarni bajarish talab etiladi.

Facebook ijtimoiy tarmog‘ida ro‘yxatdan o‘tmaganlar esa tanlov uchun ishlarini jajji-a@mail.ru pochtasiga yuborishlari mumkin.

Tanlov jarayonini #jajjiakademik xeshtegi hamda akadem.uz sayti orqali kuzatib borish mumkin.