Londonning ICE Futures birjasi va Nyu-York tovar birjasida (NYMEX) neft narxlari ko‘tarildi.

Nyu-York birjasida WTI markasidagi neftning aprel oyi fyucherslari 0,95 foizga o‘sib, 1 barreli uchun 40,56 dollarni tashkil qilmoqda.

Londondagi birjada esa Brent neftining may oyi fyucherslari 1,58 foizga qimmatlab, 1 barreli uchun 42,1 dollarga yetgan.

Bu o‘zgarishlar esa rubl kursini mustahkamlagan.

Moskvada dollarning rublga nisbatan kursi 38 kopeykaga pasayib, 1 dollar 67,74 rublni tashkil qilmoqda. Ayni vaqtda Moskvada 1 yevro narxi 76,34 rubl (-78 kopiya).

Neft narxi qatorasiga ikkinchi kun oshishiga AQShda xom ashyo qazib chiqarish hajmi pasaygani haqida ma'lumotlar va aprel oyi o‘rtalarida Qatar poytaxti Dohada neft ishlab chiqaruvchi davlatlar uchrashuvi kutilayotgani sabab bo‘lmoqda.