17 martda Reddit portali foydalanuvchilari Norvegiyaning TV2 telekanalidagi reportajda tasvirlangan g‘aroyib holatga e'tibor qaratishdi. Sport Center ko‘rsatuvi uchun intervyuni suratga olish ishlari mahalliy aeroportda olib borilayotgan bo‘lib, suratga olish vaqtida orqa planda turga ayol soniyaning bir necha ulushlari ichida izsiz yo‘qolib qolgan.

Ushbu holat tasvirlangan gif-fayl bir necha soat ichida Imgur servisida 3,5 mln namoyish to‘pladi.

Reddit’ning ko‘plab sharhlovchilari bunga hazilomuz munosabat bildirishdi. Ular “Bagaj berilayotgan vaqtda narsalar shunday yo‘qolib qoladi”, “Magllar yonida sehr qo‘llandi, vazirlikka xabar berish kerak!” (Garri Potter filmiga ishora qilinmoqda) degan izohlar qoldirishdi.

Bunga jiddiyroq yondashgan foydalanuvchilar videoda montaj izlari yo‘qligini va agar yaxshilab qaraladigan bo‘lsa, ayol “yo‘qolib qolishidan” bir lahza avval burilib, yon tomonga kamida bir qadam tashlaganini ko‘rish mumkinligini aytishgan.

Ko‘rinishicha, “kadrdan yo‘qolib qolgan” ayol uning oldida aravacha itarib ketayotgan ayol ortidan u bilan yonma-yon harakatlanib, deyarli bir vaqtda u bilan kadrdan chiqib ketgan.

Xuddi shunday voqea 2015 yilda “Rolan Garros” tennis musobaqasi jonli translyatsiyasi vaqtida ham yuz bergandi. O‘shanda teletomoshabinlarni go‘yoki dumi bilan oldinga uchayotgan samolyotning kortga tushgan soyasi o‘ylantirib qo‘ygandi. Keyinroq aniqlanishicha, ushbu samolyot haqiqiy samolyot bo‘lmay, bir necha yil avval Emirates Airlines aviakompaniyasining reklama tadbiri doirasida tennis stadioniga o‘rnatilgan samolyotning kichik maketi bo‘lgan. Maket televizion kamera trosiga mahkamlangan bo‘lib, u bilan birgalikda ham oldinga, ham orqaga harakatlana olgan.