O‘zbekiston Respublikasi Madaniyat va sport ishlari vazirligi Yoshlar madaniyat va san'at markazi davlat unitar korxonasi (keyingi o‘rinlarda “Markaz” deyiladi) O‘zbekiston Respublikasi Vazirlar Mahkamasining 2014 yil 14 avgustdagi “Yoshlar madaniyat va san'at markazi faoliyatini tashkil etish chora-tadbirlari to‘g‘risida”gi 232-son qaroriga asosan tashkil etilgan.
Markaz tashkil etilganligi ko‘p bo‘lmagan bo‘lsada, o‘z faoliyati davomida hozirga qadar ko‘plab keng qamrovli loyihalarni tashkil etdi.
Umidli ijodkor va iqtidorli yoshlarni izlab topish, qo‘llab-quvvatlash va rag‘batlantirish hamda konsert, festival, ko‘rik-tanlov va turli madaniy shou-tomosha tadbirlarini o‘tkazish, yoshlarni Vatanga muhabbat, mustaqillik g‘oyalariga sadoqat va fidoyilik ruhida tarbiyalash, yurt ravnaqiga daxldorlik tuyg‘usini mustahkamlash, ularning keng qamrovli bunyodkorlik va yaratuvchanlik jarayonidagi ishtirokini yanada kengaytirish maqsadida Markaz tomonidan o‘tgan 2015 yilda “Yil qo‘shig‘i” tanlov-konserti, “Mana Men” tele-tanlovi,
“Raqs sehri” ko‘rik-festivali, “Parvoz” o‘quv-ijodiy maktabi, “Kuyla, yoshligim” estrada-vokal tanlovi, “Keksalar e'zozda” nomli maqom konsert dasturi, “E'tirof-2015” taqdirlash marosimi o‘tkazildi, 2016 yilda “Nazm va navo” nomli konsert dasturi, “Men o‘zimni topmasam” deb nomlangan ijodiy-adabiy kecha kabi ko‘plab tadbir va loyihalar tashkil etib kelmoqda.
Shuningdek, bugungi kunda Markaz va bir qator hamkor tashkilotlar bilan birgalikda O‘zbekiston Respublikasi Davlat mustaqilligining yigirma besh yilligi munosabati bilan joylardagi ta'lim muassasalarida madaniyat va san'at namoyondalari tomonidan “Kim edigu kim bo‘ldik, ertaga qanday yuksak marralarni egallashimiz kerak?” mazmunidagi targ‘ibot tadbirlari tashkil etilmoqda.
Tashkil etilayotgan loyihalar va turli tanlovlar xaqida yoshlarga muntazam tarzda to‘liq ma'lumotlar berib borish, ularni mazkur loyihalarda keng miqiyosdagi ishtirokini ta'minlash maqsadida, Yoshlar madaniyat va san'at markazining internetdagi www.yoshlarmarkazi.uz rasmiy sayti zamon talablariga javob beradigan holda takomillashtirildi va qaytadan ishga tushirildi.
Saytda Markazning faoliyati, tashkil etilayotgan tadbirlar, loyihalar, to‘garaklar, “Yoshlar klubi” haqidagi yangiliklar muntazam yoritib boriladi va yoshlarni Vatanga muhabbat, mustaqillik g‘oyalariga sadoqat va fidoyilik ruhida tarbiyalash, yurt ravnaqiga daxldorlik tuyg‘usini mustahkamlash, ularning keng qamrovli bunyodkorlik va yaratuvchanlik jarayonlarida faol ishtirokini ta'minlashda madaniyat va san'atning rolini oshirishga qaratilgan ma'lumotlar joylashtirib boriladi.
Shuningdek, kelgusida saytda Markaz tomonidan tashkil etilayotgan loyiha va tanlovlarda ishtirok etish istagini bildirgan yoshlardan arizalarni onlayn tarzda qabul qilish tizimi yaratilishi ko‘zda tutilgan.
