Angliyaning «Liverpul» klubi bosh murabbiyi Yurgen Klopp jamoasining yuqori sport formasiga chiqib olishi uchun vaqt kerakligini ta'kidlab o‘tdi.

«Liverpul»da yetakchi murabbiylar va futbolchilar bilan ishlamoqdaman. 4 oy ishlab bildimki, bu yerdagilar g‘alabaga juda chanqoq. Biz jamoani o‘z vaqtida bo‘lgan darajasiga olib chiqish uchun harakat qilmoqdamiz. Ikkala Manchester jamoasi va londonliklar ko‘p pul tikish imkoniyatiga ega.

Lekin shunga qaramay, hattoki sen to‘g‘ri yo‘ldan ketayotgan bo‘lsang ham bu APLda yuqori o‘rinlarda yurishingga kafolat bermaydi. Chunki boshqa klublar ham to‘g‘ri yo‘ldan ketishayotgan bo‘ladi.

Germaniyada hamma APLning televideniyeda topayotgan pullarini yaxshi biladi. Bundesligada ham shunday moliyaviy imkoniyat yaratilsa yaxshi bo‘lardi. Lekin bu chempionatda sen topayotgan pulni boshqa jamoalar ham topadi. Eng katta qiyinchiliklar mana shundan kelib chiqadi.

«Liverpul»da o‘zimni juda yaxshi his qilmoqdaman. Bu juda muhim jamoa, juda muhim joy. «Enfild» – ajoyib stadion. Bu yerda har doim yangi tarix yaratiladi.

Bu men uchun katta faxr, men bu yerda ekanimdan faxrlanaman. Siz g‘alabaga chanqoq va har daqiqada sovrinlarni qo‘lga kiritish haqida o‘ylayotgan bo‘lsangiz biroz sabr qilishingiz kerak bo‘ladi. Yutuqlarni qo‘lga kiritishimiz uchun bizga ma'lum vaqt zarur», – deya Kloppdan iqtibos keltiradi Goal.com internet-nashri.