Суғуртада янги давр: жавобгарлик ҳимояси икки баравар оширилди

Ушбу қарор билан Президентнинг 2024 йил 1 мартдаги ПҚ–108-сонли қарори ижросини таъминлаш механизмлари белгилаб берилди. Энг муҳими — 2026 йил 1 январдан бошлаб мажбурий суғурта суммаси амалдаги 40 миллион сўмдан 80 миллион сўмгача оширилади.

Мамлакатдаги иқтисодий ўсиш суръатлари ва реал харажатлар фондида бу ўзгариш суғурта тўловлари реал ҳаёт талабларига мослашганини англатади. Аввалги тартибда ҳатто максимал суғурта тўлови 14 миллион сўмдан ошиб бормаган ҳолларда, жабрланувчилар кўп бўлса, сумма тақсимланиб кетар эди. Янги қарор эса нафақат соғлиқ ва мол-мулк зарарларини қоплаш имкониятини кенгайтиради, балки ҳақиқий ҳимоя кафолатини яратади.

Аниқ рақамлар нима дейди?

Янги тартибга кўра, мажбурий суғурта учун фуқаролар тўлайдиган мукофот суммаси Тошкент шаҳрида 192 минг сўмни, бошқа ҳудудларда эса 160 минг сўмни ташкил этади. Бу – ўртача машина ювиш нархига яқин миқдор. Шу боис, суғурта хизмати учун ушбу тўлов ҳозирда ҳам иқтисодий жиҳатдан мақбул ҳисобланади.

Яна қандай ўзгаришлар бор?

• Суғурта тарифлари ва мукофотлари актуар ҳисоб-китоблар асосида аниқланади — бу келажакдаги суғурта тўловларини аниқ баҳолаш имконини беради.
• Ҳайдовчилар сонига қараб чекланган ва чекланмаган полис турлари жорий этилади.
• Суғурта компаниялари ўз мижозлари манфаатларини ҳимоя қилиш учун масъулликни янада теран ҳис қилади.
• ЙТҲ ҳолатларида юридик маслаҳат бериш ва ҳужжатлаштиришни осонлаштирадиган аджастерлик хизматларини суғурта кафолатлаш жамғармаси ўз зиммасига олади.
• Суғурта шартномаларини автоматлаштириш мақсадида Ягона суғурта биллинг тизими 2026 йил 1 апрелдан жорий этилади.

Бу қарорлар нафақат суғурта бозорида рақобатни кучайтириши, балки фуқаролар ҳуқуқини қонунан таъминланган ҳимояга айлантиради. Энди фуқаро нафақат тўлов қилувчи, балки ҳақиқий манфаатдор, ҳимояланган иштирокчига айланади.

Реклама ҳуқуқи асосида