Литва ва Финландия пиёдаларга қарши миналар ишлаб чиқаради

Пиёдаларга қарши миналардан фойдаланишни тақиқловчи Оттава конвенциясидан чиққанини эълон қилган Финландия ва Литва 2026 йилдан бошлаб ошиб бораётган Россия таҳдиди фонида шу турдаги қуролларни ишлаб чиқаришни бошлайди. Бу ҳақда Ҳелсинки ва Вилнюсдаги амалдорларга таяниб Reuters хабар берди.

«Биз танклар ва пиёдаларга қарши миналарга юзлаб миллион евро сарфлаш ниятидамиз. Бу сезиларли даражадаги сумма», - дейди Литва мудофаа вазири ўринбосари Каролис Алекса. Унинг сўзларига кўра, давлат камида 10 мингта пиёдаларга қарши мина буюртма қилади ва Литва саноати уларни ишлаб чиқаришни таъминлай олади. Литва ўзида ишлаб чиқаришни йўлга қўйгач, ушбу маҳсулотни бошқа давлатларга, жумладан, Украинага етказиб бериши мумкин.

Финландиянинг Россия билан чегараси 1340 километрга тенг — бу НАТОга аъзо ҳар қандай давлатникидан узунроқ. «Финландияга етказиб беришлар хавфсизлигини таъминлаш учун пиёдаларга қарши миналарни ишлаб чиқариш имкониятига эга бўлиш керак. Бу юқори самарадор ва жуда тежамкор қуролланиш тизими», - дейди Финландия парламентининг мудофаа бўйича қўмитаси раҳбари Ҳекки Аутто. У Финландия ҳам Украинага пиёдаларга қарши миналар етказиб бериши мумкинлигини таъкидлаган.

Ауттонинг айтишича, Оттава битимига қўшилгунга қадар Финландия ихтиёрида 1 миллиондан ортиқ пиёдаларга қарши миналар бўлган. «Улар бизда сақланаётганида — бу уларни ҳеч қачон ишлатишга тўғри келмаслигининг энг ишончли кафолатидир», - дейди парламент вакили.

Ҳар икки давлат расмийларига кўра, Оттава конвенциясидан чиқиш бўйича олти ойлик жараён якунлангач, пиёдаларга қарши миналар ишлаб чиқарилиши қайта йўлга қўйилиши мумкин.

НАТО ва Евроиттифоқнинг яна уч давлати — Полша, Латвия ва Эстония ҳам Москванинг тажовузкор ҳаракатлари фонида битимдан чиқаётган бўлса-да, мина ишлаб чиқаришни бошлаш режалари ҳақида эълон қилмаган. Бироқ уларнинг расмийлари зарурат туғилганда бу жараённи тезда оммавий ишлаб чиқариш даражасига олиб чиқишлари мумкинлигини билдирган.