Данияда Писториус Болтиқбўйининг хавфсизлиги муҳимлигини таъкидлади

Германия Болтиқ денгизи хавфсизлигини назорат қилиш, тегишли операцияларни сезиларли даражада кучайтириш бўйича етакчи ролни ўз зиммасига олди, деди Германия мудофаа вазири Борис Писториус Данияга ташрифи чоғида. Даниялик ҳамкасби Троэлс Лунд Поулсен билан бўлиб ўтган қўшма матбуот анжуманида у Россия Федерациясидан денгиз хавфсизлигига таҳдидлар кучайиб бораётганига ишора қилди.

«Денгиз таҳдидлари ортиб бормоқда, бу аниқ», — дея таъкидлади Писториус Болтиқ денгизидаги гибрид ҳужумлар, хусусан, кема лангарлари томонидан сувости кабелларининг шикастланиши ва GPS сигналларининг бузилишини мисол сифатида келтириб. Бундан ташқари, Германия Мудофаа вазирлиги раҳбари Арктика минтақасининг Россия томонидан милитаризацияси ҳақида гапирди.

Германия вазири Данияни Украинага ҳарбий ёрдам кўрсатиш борасидаги саъй-ҳаракатларда «ишончли ҳамкор» деб атади. Мамлакатнинг қўллаб-қувватлаши «Европа мудофаасига қўшилган ажралмас ҳиссадир», дея қўшимча қилди у.

Ўз навбатида, Поулсен Германиянинг мудофаа сиёсатини ўзгартириш борасидаги саъй-ҳаракатларини қўллаб-қувватлади, хусусан, ҳарбий-саноат лойиҳаларига сармоя киритиш жадаллашуви, шунингдек, мудофаа салоҳияти кенгайишини қайд этди.