Telegram бир нечта OSINT каналларни блоклади

Telegram мессенжери очиқ манбаларга асосланган маълумотларни эълон қиладиган (OSINT) суриштирув каналларидан бир қанчасини огоҳлантиришсиз ва тушунтиришсиз блоклади. «Этичный хакер» канали биринчи бўлиб бунга эътибор қаратди, унинг муаллифлари камида бешта шундай ресурс мавжуд эмаслиги ҳақида хабар берди.

«Каналларнинг ҳар бири бир неча йиллардан бери ишлаган ва жамият қоидаларини бузмаган эди», деб даъво қилди «Этичный хакер» муаллифлари.

«Важные истории» нашрининг ёзишича, Россия, Беларус ва Гуржистонга тегишли бир қанча каналлар ёпилган. Уларнинг барчаси ўз номида OSINT (Open Source Intelligence — очиқ маълумотлар асосида разведка) қисқартмасидан фойдаланган.

«Биз Павел Дуров Украина мудофаа кучларига нисбатан нодўстона қадам ташлади, деб ҳисоблаймиз. Telegram амалий, ҳарбий OSINT билан шуғулланадиган деярли барча каналларни блоклади... Украина OSINT каналлари россиялик ҳарбий жиноятчиларни, техника ва аскарлар тўпланган манзилларни аниқлаш, умуман олганда оккупантга қарши кураш билан шуғулланган», деди «OSINT Бджоли» лойиҳаси муаллифи.

Каналлар блоклангани ҳақида журналист ва Deutsche Welle фактчекери Павел Банников ҳам хабар берди. Унинг фикрича, Telegram бу қарорни ўзи қабул қилмаган бўлиши мумкин — бунга бот ҳужумлари ёки оммавий шикоятлар сабаб бўлиши мумкин. Мессенжер вакиллари ҳозирча вазиятга изоҳ бермади.