Ҳиндистон ва Россия С-400 ЗРК ва бошқа қуролларни етказиб беришни муҳокама қилди

Ҳиндистон ва Россия Россиянинг С-400 зенит-ракета комплексларини етказиб бериш, Су-30 МКИ қирувчиларини модернизация қилиш ва муҳим ҳарбий техникани сотиб олиш масалаларини муҳокама қилди. Бу ҳақда Ҳиндистон ҳукумати 27 июн, жума куни Хитойнинг Циндао шаҳрида Шанҳай ҳамкорлик ташкилоти (ШҲТ)га аъзо давлатлар ташқи ишлар вазирлари йиғилиши фонида икки давлат ташқи ишлар вазирлари - Ражнат Сингх ва Андрей Белоусов ўртасида бўлиб ўтган музокаралар якунлари бўйича маълум қилди.

Ҳиндистон Мудофаа вазирлигининг Instagramʼдаги саҳифасида айтилишича, Сингх ва Белоусов «Ҳиндистон ва Россия ўртасидаги икки томонлама мудофаа ҳамкорлигини мустаҳкамлаш бўйича самарали музокаралар олиб борган».

Ўз навбатида, ТАСС агентлиги Ню-Деҳлининг Россия қуролларини харид қилиши «қисқа вақт ичида» амалга ошириши кераклигини таъкидлайди. «Бу икки давлат (мудофаа) вазирлари ўртасида «Синдур» операцияси ва мудофаа, айниқса, ҳаво ҳужумидан мудофаа, ҳаво-ҳаво синфидаги ракеталар, замонавий имкониятлар ва авиация платформаларини модернизация қилиш каби муҳим соҳаларда ишлаб чиқаришни кучайтириш зарурати фонида бўлиб ўтган энг муҳим учрашувлардан бири бўлди», — дея ТАСС Ҳиндистон Мудофаа вазирлиги баёнотини келтиради.

Бунда Ҳиндистоннинг Покистон ҳудудида 7 май куни бошланган ҳарбий операциясига ишора қилинмоқда. Ўшанда Ҳиндистон Мудофаа вазирлиги Покистондаги, шунингдек, Кашмирнинг Покистон қисмидаги «террорчи» инфратузилмага ҳужум қилингани ҳақида хабар берган эди.

Ҳиндистон ва Покистон ўртасида бир неча ўн йиллардан бери кузатилаётган можаро 22 апрел куни Паҳалгам шаҳрида бир гуруҳ жангарилар томонидан уюштирилган ҳужумда 26 киши ҳалок бўлганидан сўнг авж олди. Ҳалок бўлганларнинг аксарияти сайёҳлар эди. Ҳиндистон Исломободни воқеага алоқадорликда айблади, бироқ Покистон бу айбловларни рад этиб, мустақил тергов ўтказишга чақирди.