«Рус аскари фақат ўлим ва ҳалокат келтиради» - Украина ТИВ Путиннинг сўзлари ҳақида

Украина ташқи ишлар вазири Андрей Сибига Россия президенти Владимир Путиннинг Санкт-Петербург халқаро иқтисодий форумида (ПМЭФ) Украинадаги уруш ҳақида айтган сўзларини «бемаънилик» деб атади. 

Унинг таъкидлашича, Қўшма Штатлар ва бутун дунё ўт очишни тўхтатишга чақираётган паллада Россия президенти «Украинанинг янги ҳудудларини эгаллаб олиш ва кўпроқ украиналикларни ўлдириш режаларини муҳокама қилмоқда».

Сибига Путиннинг Россия армияси қаерларга етиб бориши мумкинлиги ҳақидаги сўзларига ҳам изоҳ берди. Хусусан, Россия президенти «рус аскарининг қадами етган жой бизники», деган эди.

«Аммо бугунги кунда Путиннинг телба баёнотлари орасида рус аскарининг қадами ҳақидаги сўзлари ажралиб туради. Аслида, рус аскарининг қадами қаерга етса, у фақат ўлим, ҳалокат ва вайронагарчилик олиб келади. Путинни рус аскарлари ва уларнинг Украина дронлари томонидан узиб олинган оёқлари қайғуга солмайди. У ўз халқининг оммавий қотили», деди Украина Ташқи ишлар вазирлиги раҳбари.

20 июн куни Санкт-Петербург халқаро иқтисодий форумида (ПМЭФ) иштирок этган Владимир Путин Украина ҳақидаги фикрларини айтди.

«Ҳарбий ҳаракатларнинг маълум бир мантиғи содир бўлмоқда ва қўшинлар турли ҳудудларни эгалламоқда. Бизда эски қоида бор – рус аскарининг қадами етган жой бизники», деган эди Россия президенти.