Apple қўш экранли iPhone чиқаради: у ҳақда нималар маълум

Маълумки, янги гаджет букланганда 5,5 дюйм ва очилганда 7,8 дюймли OLED экранга эга бўлади.

Фото: FoneArena

Таниқли таҳлилчи Мин-Чи Куо фикрича, Apple келаси йили ўзининг биринчи букланадиган смартфонини чиқариши керак. Купертино бундай гаджетлар бозорига кириш учун жиддий тайёргарлик кўрмоқда.

Унга кўра, йиғма қисмларни етказиб берувчи Foxconn заводи сентябр-октябр ойларида букланадиган iPhone лойиҳасини расман ишга туширади. Аксарият компонентлар ҳали ишлаб чиқилаётган бўлсада, Куо бозор иштирокчилари учун алоҳида қизиқиш уйғотадиган букланадиган дисплей аллақачон тасдиқланганини таъкидлайди.

Смартфон 2026 йил ёзида оммавий ишлаб чиқарилиши кутилмоқда, тақдимоти эса ўша йил кузида бўлиб ўтади. Apple букланадиган қурилмани iPhone 18 сериясининг бир қисми сифатида эълон қилмоқчи.

Ҳозирча ушбу iPhone ҳақида расмий маълумотлар йўқ - фақат инсайдер маълумотлари. Смартфон эгилувчан 7,8 дюймли OLED-дисплейга эга бўлиши кутилмоқда. Яъни, ўлчами бўйича у деярли планшет дисплейининг ҳажмига етади. Ташқи экран букланганда диагонали 5,5 дюймга тенг бўлади.

Аввалроқ Марк Гурман iPhone Fold иккита асосий хусусиятга эга бўлишини маълум қилганди. Биринчиси, очилганда деярли сезилмайдиган бурма. Иккинчиси - барча рақобатчиларга қараганда анча юқори сифатли шарнир. Катта эҳтимол билан у титан ва зангламайдиган пўлатдан ясалган бўлади.

Охирги маълумотларга кўра, букланадиган iPhone нархи 2000 доллардан 2500 долларгача бўлади. Чиқарилганидан кейинги биринчи йилда Apple янги маҳсулотга бўлган қизиқишни 6 миллион донага баҳоламоқда.

Apple аслида маҳсулот ассортиментида ҳали ҳам букланадиган қурилмага эга бўлмаган ягона технологик гигант бўлиб қолмоқда. Шу билан бирга, асосий рақобатчи Samsung бу йил учга букланадиган биринчи телефонни чиқаришга тайёргарлик кўрмоқда. Шунингдек, iPhone 16 нархидаги буклама смартфонни ҳам ишлаб чиқаришга тайёрланмоқда.

#iPhone #Apple #буклама смартфон