«Челси»нинг янги ҳужумчиси ишончни оқлашни бошлади, Ди Мария ва Отаменди «Бенфика»ни қутқарди

Жиру «Лос-Анжелес»ни қутқаролмади

D гуруҳи
«Челси» – «Лос-Анжелес» 2:0
Голлар: Педру Нету 34, Фернандес 79
«Челси»: Санчес, Адарабиойо, Колвилл, Кукуреля, Жеймс (Гюсто 46), Кайседо (Эссугу 84), Лавиа (Фернандес 46), Палмер (Нкунку 84), Мадуэке (Делап 64), Педру Нету, Жексон (Жорж 64).
«Лос-Анжелес»: Лиорис, Сегура, Лонг, Ҳоллингсҳед, Паленсия, Игор Жезус (Амайя 81), Делгадо (Марлон 87), Тиллманн (Йебоа 87), Буанга, Ордаз (Мартинес 38), Эбобисс (Жиру 46).
Огоҳлантиришлар: Жеймс 36, Адарабиойо 45, Кукуреля 75 – Мартинес 58, Паленсия 90.

«Челси» клублар ўртасидаги жаҳон чемпионатидаги ниятлари жиддий экани мавсум стартидаёқ маълум бўлганди — ўшанда Конференциялар лигаси учун қайдномага Палмер киритилмаганди. Англия нашрлари Лондон клуби бу билан асосий юлдузига катта юклама туширмасликни ва бу орқали у АҚШдаги турнир стартига яхши формада етиб боришини мақсад қилгани ҳақида ёзганди.

Эътиборли жиҳати, «Челси» ўзининг турнирдаги илк рақибини фақат 1 июн кунига келиб билди. Аввалига бу «Леон» бўлиши керак эди, аммо ФИФА Мексика жамоасини турнирдан четлатди, чунки ушбу клуб ва клублар ўртасидаги жаҳон чемпионатининг бошқа бир иштирокчиси «Пачука»нинг эгаси бир шахс экани ойдинлашди. Бўш қолган ўрин учун «Америка» ва «Лос-Анжелес» ўртасида ўтиш ўйини бўлиб ўтди, улардан бири КОНКАКАФнинг рейтинги энг юқори клуби, иккинчиси 2023 йилги минтақавий ЕЧЛ финалида «Леон»га ютқазган жамоа сифатида йўлланма учун курашди.

Мехикодан бўлган «Америка» клуби бир ҳафта ичида иккита кучли зарбани қабул қилиб олди, аввалига Мексика кубоги финалида «Толука»га ютқазди, кейин эса Лос-Анжелесдаги драматик баҳсда ўйиннинг асосий вақти тугаётганида минимал ҳисобдаги устунлик бой берилди. Иккинчи қўшимча бўлим сўнггида эса америкаликлар ўзининг энг яхши тўпурари Буанга ва унга ассистентлик қилган Жирунинг ҳаракатлари эвазига ғалабани илиб кетди. Француз фахрийси МЛСнинг кўп ўйинларида бўлгани каби захирадан туширилганди.

«Челси» билан ЕЧЛ, Европа лигаси ва Англия кубогида ғолиб бўлган Жиру собиқ жамоасига қарши ўйинда ҳам иккинчи бўлимда майдонга тушди. Биринчи бўлимда эса Педру Нету «Лос-Анжелес» сафидаги бошқа бир француз футболчиси Лиорис қўриқлаётган дарвозани ишғол этишга улгурганди.

Сўнгги тўққиз ўйинида мағлубиятга учрамаган «Лос-Анжелес» иккинчи бўлим давомида фаоллашди ва «Челси» мудофааси босим остида ушлаб турди. Вазиятлардан бирида Санчес Буанганинг зарбасини оёқлари билан қайтариб олди, кейин эса кўклар сафида жамоанинг ёзги трансферлардаги илк хариди Делап майдонга тушди. У тавқи лаънатга учраган деб ҳисобланувчи тўққизинчи рақамни олишдан чўчимади. Кежман, Креспо, Фернандо Торрес, Фалкао, Мората, Игуаин, Абраҳам, Лукаку — уларнинг барчаси «Стэмфорд Бриж»да ёки муваффақиятсизликка учраган, ёки ўз даражасидан пастроқ ўйин кўрсатган. Делап эса дебютини ёрқин ўтказиб, қисқа вақт ичида Энцо Фернандесга иккита вазият яратиб берди ва бу вазиятлардан бири гол билан якунланди. Бу гол Жиру ўз имкониятидан фойдалана олмаганидан кейин уюштирилган ҳужумда урилди. Энди кейинги турни «Челси» «Фламенго»га қарши ўтказади, «Лос-Анжелес» гуруҳ аутсайдери, Туниснинг «Эсперанс» жамоаси билан ўйинда вазиятни ўнглашга ҳаракат қилади.

Европа Жанубий Америкага қарши

C гуруҳи
«Бока Ҳуниорс» – «Бенфика» 2:2
Голлар: Мерентиэл 21, Батталя 27 – Ди Мария 45 (пеналти), Отаменди 84.
«Бока Ҳуниорс»: Марчесин, Фигал, Коста, Бланко, Адвинкула, Батталя, Паласиос (Аларкон 66), Эррера (Белмонте 20), Веласко (Хименес 58), Сенон, Мерентиэл (Себалос 65).
«Бенфика»: Трубин, Силва, Отаменди, Каррерас, Дал (Белотти 46), Флорентину (Баррейру 90), Ренату Санчеш (Ўрхон Кўкчу 61), Эурснес, Брума (Карим Оқтуркўғли,61), Ди Мария (Престианни 77), Павлидис.
Огоҳлантиришлар: Паласиос 66, Коста 85 – Каррерас 67, Павлидис 83.
Четлатишлар: Белотти 72 – Фигал 88

Қаторасига иккини кун Европа ва Жанубий Америка вакиллари қарама-қаршилиги кузатилди, биринчи кунги баҳслар доирасида «Порту» ва «Палмейрас» ўзаро голсиз дуранг қайд этиб, мухлисларнинг ҳафсаласини пир қилганди.

Иккинчи дербида эса стадионни тўлдириб ўтирган мухлислар зерикиб қолишмади. Майамида «Бока Хуниорс» ўзини уйидагидек ҳис қилди. Бу ўйин олдидан «Бока» таркиб борасида муаммоларга учраганди. Кавани гуруҳ босқичи охиригача сафдан чиққан. Ўз вақтида «МЮ» сафида ўйнаган Рохо ҳам жамоага ёрдам бера олмайди, 20-дақиқада эса 36 ёшли Андер Эррерани алмаштиришга тўғри келди. «Атлетик», «МЮ» ва «ПСЖ»да энг яхши даврларини ўтказган футболчи захира ўриндиғида ўтириб ҳакам билан баҳслашгани туфайли қизил карточка ҳам олди, биринчи бўлим сўнгида арбитр VAR билан маслаҳатлашиб, жанубий америкаликлар дарвозасига пеналти белгилаганди. Эътиборли жиҳати, Европа жамоаси сафидаги икки аргентиналик ватандошларини ранжитишди —  Отаменди 11 метрлик жарима зарбаси ишлади, турнирдан кейин қадрдон жамоаси «Росарио Сентрал»га қайтиши маълум бўлиб улгурган Ди Мария эса зарбани бенуқсон ижро этди.

Лекин бу гол билан «Бенфика» фақат ҳисобни қисқартирди, «Бока» «бургутлар»нинг ўйин бошидаги ҳужумларига дош бергач, олти дақиқа ичида икки гол уришга эришганди. Аввалига Бланко қанотда рақибни чиройли тарзда алдаб ўтиб, тўпни дарвозабон ҳудудига етказиб берди ва уругвайлик тўпурар Мерентиэл Отамендидан илдамроқ ҳаракат қилиб, дарвозани ишғол этди. Аргентиналиклар ижро этган илк бурчак зарбаси эса Коста тўпни устун ёнида турган Батталяга ташлаб бериши билан якунланди. 

Жанубий америкаликлар ғалабага яқин эди. Қолаверса, иккинчи бўлимда лиссабонликлар ҳужумини кучайтириш учун туширилган Белотти ҳужумдаги қўполлик учун майдондан четлатилди. Аммо иккинчи бўлимда ўйиндан вазият ярата олмаган европаликлар Отаменди бурчак зарбасидан урган гол эвазига мағлубиятдан қутулиб қолди, бу аргентиналик ҳимоячи учун мавсумдаги саккизинчи гол бўлди. Ҳисоб 2:2 ҳолатида эса Фигал майдондан четлатиб, таркиблар сон жиҳатдан тенглашди.

Голларга бой кечган ўйин гуруҳда сўнгги тургача интрига сақланиб қолишини таъминлади. Энди «Бенфика» ва «Бока» биринчи турда «Окленд» дарвозасига 10 та жавобсиз тўп киритган «Бавария»га қарши муносиб ўйнаши талаб этилади.