Трамп: «Афтидан, Путинга Россиянинг Украинадаги йўқотишлари аҳамиятсиз»

Россия Украинага қарши урушда ҳафтасига 5000 аскарини йўқотмоқда, бироқ бу жангни давом эттириш ниятида бўлган Россия президенти Владимир Путинга таъсир қилмаяпти, деди АҚШ президенти Доналд Трамп. «У парво қилмаяпти. У жуда кўп қўшинларини йўқотмоқда, Украина ҳам. Кўрамиз, кейин нима бўлади», — деди Трамп 11 июн, чоршанба куни кечқурун Pod Force One подкастида.

Унинг сўзларига кўра, Москва ва Киев ўртасидаги тўғридан тўғри музокаралар чоғида маълум ютуқларга эришилган, бироқ кейин «улар бомбардимон қилинмаслиги керак бўлган нарсани бомбардимон қилган». Бу «ўзгаришларнинг охири» эди, деди Оқ уй раҳбари.

Аввалроқ, The Atlantic'нинг Оқ уйдаги манбалари Трамп Украина Хавфсизлик хизмати (СБУ)нинг «Ўргимчак тўри» шифрланган операциясидан норози эканини маълум қилганди, унинг натижасида июн ойи бошида дронлардан фойдаланган ҳолда камида 12 нафар Россия стратегик бомбардимончи самолёти йўқ қилинди.

Ўз атрофидагилар билан суҳбатда Трамп бу можаронинг кучайишига олиб келиши мумкинлигини ва Украина президенти Володимир Зеленский намойишкорона операциялар ўрнига Истанбулдаги Россия билан музокараларга эътибор қаратиши кераклигини таъкидлади. Шундан сўнг Оқ уй раҳбари Путин ва Зеленский бир-биридан «нафратланишини» айтди ва уларнинг хатти-ҳаракатларини кўчада муштлашаётган икки кичкина болага қиёслади. Унинг сўзларига кўра, уларни ажратиш вақти келгунига қадар иккаласига ҳам «бироз кўпроқ курашишга» рухсат бериш керак.

Бунга жавобан Зеленский Путин билан кўчадаги ўйин майдончасидаги болалар эмаслигини айтди.