Сербия президенти уруш бошланганидан бери биринчи марта Украинага келди

Александр Вучич Одессага Украина - Жануби-Шарқий Европа саммитида иштирок этиш учун келди. Унинг ташрифи аввалдан эълон қилинмаган.

Фото: Telegram / V_Zelenskiy_official

Сербия президенти Александр Вучич 11 июн, чоршанба куни Россиянинг мамлакатга қуролли бостириб кириши бошланганидан бери илк расмий ташрифи билан Украинага келди. Унинг ташрифидан мақсад Украина – Жануби-Шарқий Европа саммитида иштирок этиш эди, деб хабар қилди Сербия президенти маъмурияти. Сафар атиги бир кун давом этди ва эълон қилинмади.

Саммитда Вучич «украиналикларни қўллаб-қувватлашини яққол кўрсатиш» учун Сербия Украинага Украинанинг бир ёки иккита шаҳар ёки вилоятини тиклашда ёрдам беришга тайёрлигини айтди. У Белград Украинанинг ҳудудий яхлитлигини қўллаб-қувватлаганини таъкидлади.

Одессадаги Украина – Жануби-Шарқий Европа саммити, жумладан, Қора денгиздаги хавфсизлик масалаларига бағишланди, деб хабар берди Украина президенти Володимир Зеленскийнинг учрашув иштирокчиларининг қўшма суратини чоп этган матбуот хизмати. Руминиянинг янги президенти Никушор Дан ҳам сайловдаги ғалабасидан кейин биринчи марта Украинага келди.

Одесса саммитида Молдова президенти Майя Санду, Греция бош вазири Кириакос Мицотакис ва Хорватия бош вазири Андрей Пленкович ҳам иштирок этди. Уларнинг барчаси Украинани қўллаб-қувватлайди ва Зеленский билан бир неча бор учрашган. Вучичнинг ташрифи диққатни тортди, чунки Белград амалда нейтрал ҳисобланади. Сербия Москванинг Украина ҳудудларини аннексия қилишга уринишини тан олмайди, лекин Европа Иттифоқи аъзолигига номзод мақомига эга бўлишига қарамай, Россияни танқид қилишдан ёки унга қарши санкциялар жорий этишдан тийилади.

Май ойида 55 ёшли Александр Вучич Европа Иттифоқи раҳбариятининг эътирозларига қарамай, Москвага ташриф буюрди ва у ерда Иккинчи жаҳон урушидаги ғалабанинг 80 йиллигига бағишланган тантаналарда қатнашди. У 2017 йил 1 июндан буён Сербия президенти.

#Украина #Сербия #Александр Вучич