Шавкат Мирзиёев Владимир Путинни «Россия куни» билан табриклади

Ўзбекистон ва Россия раҳбарлари телефон орқали мулоқот қилди.

Президент Шавкат Мирзиёев Россия президенти Владимир Путин билан телефон орқали мулоқот қилди.

Суҳбат аввалида давлат раҳбари Россия етакчиси ва кўп миллатли халқини яқинлашиб келаётган давлат байрами - «Россия куни» билан самимий табриклади.

Ўзбекистон билан Россия ўртасидаги кенг қамровли стратегик шериклик ва иттифоқчилик муносабатларини янада мустаҳкамлаш, олий даражадаги учрашувларда эришилган келишувларни амалга ошириш доирасида кўп қиррали ҳамкорликни кенгайтириш масалалари кўриб чиқилди.

Ўзаро товар айирбошлаш суръатини сақлаб қолиш ва саноат кооперацияси лойиҳаларини қўллаб-қувватлаш мақсадида мувофиқлаштирилган чоралар кўришга алоҳида эътибор қаратилди.

Икки мамлакат ҳудудлари даражасидаги фаол алмашинувлар ва амалий ҳамкорликни давом эттириш муҳимлиги таъкидланди.

Шунингдек, Ўзбекистон ва Россияда маданий тадбирлар мунтазам ўтказилаётгани катта мамнуният билан қайд этилди.

#Владимир Путин #Россия #Шавкат Мирзиёев