Маск Трамп ҳақидаги айрим постлари учун узр сўради

Миллиардер “чегарадан чиқиб кетгани”ни айтиб, афсусдалигини билдирди. У АҚШ ҳукуматидан кетганидан саноқли кунлар ўтиб, X тармоғида президент Доналд Трамп билан очиқчасига жанжаллашиб кетган, кейинроқ ўз постларини ўчириб юборган эди.

Фото: AP

Америкалик миллиардер Илон Маск ўтган ҳафта ўзаро жанжалга сабаб бўлган АҚШ президенти Доналд Трамп ҳақидаги баёнотларидан афсусда эканини айтди.

«Ўтган ҳафта президент Доналд Трамп ҳақидаги айрим постларимдан афсусдаман. Улар чегарадан чиқиб кетди», деб ёзди Илон Маск Х ижтимоий тармоғида. Аммо қайси постлари эканига аниқлик киритмади.

Миллиардер ва президент ўртасидаги можаро тадбиркор ҳукумат самарадорлиги департаменти (DOGE) бошлиғи лавозимини тарк этганидан сўнг, ўтган ҳафта юзага келганди.

Маск президент имзолаган бюджет лойиҳасини «жирканч» деб атаган, Трамп эса бунга жавобан тадбиркор ақлдан озганини айтиб, унинг компаниялари билан ҳукумат шартномаларини бекор қилиш билан таҳдид қилганди.

Шундан кейин Маск барча Crew Dragon кемалари парвозини тўхтатиб қўйишга ваъда берди, лекин тез орада фикрини ўзгартирди. Миллиардер, шунингдек, президентнинг жинсий жиноятда айбланган молиячи Жеффри Эпштейн ишига алоқадорлигини даъво қилди, аммо тез орада бу постни ўчириб ташлади.

#АҚШ #Илон Маск #Доналд Трамп