Мадлин кемаси фаолларини ўғирлаган Исроил, Лос-Анжелесда авж олган намойишлар ва Оқ уйда ёқалашган Маск – кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

{Yii::t(}

Ўтказиб юбориш 6s

Ўтказиб юбориш

Исроил Ғазо блокадасини бузиш учун келаётган Мадлин кемаси ва фаолларни ушлади

Душанба тонгида Исроил Ташқи ишлар вазирлиги Ғазо сари йўл олган, ичида Фаластинни қўлловчи фаоллар ва оз миқдордаги ёрдам юклари бор бўлган кеманинг Исроил қирғоқларига бурилганини маълум қилди. Унга кўра, йўловчилар ўз мамлакатларига қайтарилиши кутилмоқда.

Якшанба куни Исроил ушбу кеманинг Ғазога етиб боришига йўл қўймаслигини яна бир бор таъкидлаганди. Улар Ғазо секторига нисбатан жорий этилган денгиз блокадаси бузилишининг ҳар қандай йўл билан олди олинишини айтган.

Халқаро нодавлат ташкилот — Freedom Flotilla Coalition'нинг Мадлин кемаси 1 июнь куни Сицилиядаги портдан Ғазо секторига инсонпарварлик ёрдами етказиш ҳамда Ғазонинг деярли 20 йиллик блокадасига қарши йўлга чиққан эди.

Сафарда 12 кишилик экипаж қатнашмоқда. Йўловчилар орасида швециялик иқлим фаоли Грета Тунберг, Европа парламенти аъзоси асли фаластинлик Рима Ҳассан, Al Jazeera мухбири Омар Фаиад, бразилиялик фаол Тиаго Авила, шунингдек Франция, Нидерландия, Германия ва Испания фуқаролари бўлган фаоллар бор.

Исроил ТИВ душанба куни ижтимоий тармоқларда Грета ва бошқаларни «фақат эътибор қозониш учун уюштирилган оммавий шов-шув» яратишда айблади.

«Машҳур шахслар селфи яхтаси ҳозирда хавфсиз тарзда Исроил қирғоқларига етиб келмоқда», деб ёзди Исроил ТИВ. Кейинроқ эса экипажнинг қутқарув жилетлари кийган ҳолатда, сув ва сэндвичлар таклиф этилаётган ҳолатдаги видеосини улашди.

Исроил ТИВнинг бу баёнотлари Freedom Flotilla Coalition гуруҳи кема устида дронлар учаётгани ва сигнал берилгани ҳақида хабар берганидан сўнг чиқди. Кейинчалик гуруҳ Мадлин билан алоқа узилганини ва фаоллар Исроил армияси томонидан «ўғирлаб кетилганини» билдирган.

Мадлин бортидаги экипажнинг айтишича, маҳаллий вақт билан соат 1:00 дан кейин уларнинг кемасига тўрт тез юрувчи катер яқинлашган.

Шундан сўнг икки дрон яқинлашиб, экипаж устига оқ модда пуркаган. Дронлар радио тўлқинлар орқали шовқинли товушлар тарқатган, алоқа бутунлай йўқолган. Алоқа узилишидан аввал олинган видеода, экипаж аъзолари қўлларини кўтарган ҳолда телефонларини денгизга улоқтиришга мажбур бўлишган. Сўнгра Исроил Ташқи ишлар вазирлиги экипажнинг Ашдод портига олиб кетилаётганини эълон қилди.

Бразилиялик фаол олдиндан ёзиб қўйилган видеода: «Агар бу видео эълон қилинса, демак мен Исроил ёки бошқа ҳамкор кучлар томонидан ҳибсга олинган ёки ўғирланганман», деган. Шунингдек, Грета Тунберг ҳам ўз видеомурожаатида «Агар бу видеони кўрсангиз, биз халқаро сувда Исроил кучлари томонидан тўхтатилган ва ўғирланганмиз», – деб пост қолдирган.

Лос-Анжелесда норозилик намойишлари авж олди

Калифорния жанубидаги Лос-Анжелесда ICE иммиграция хизматининг кенг кўламли рейдлари туфайли норозилик намойишлари бошланди. Шу кун аввалида ноқонуний муҳожирларни тутиш ва депортация қилиш билан шуғулланувчи ICE 44 кишини қўлга олган, яна бир киши агентларга қаршилик кўрсатгани учун ушланганди.

Гувоҳларнинг сўзларига кўра, ICE инспекторлари рейдлар давомида кўздан ёш оқизувчи газ ва шовқинли гранаталардан фойдаланган. Шундан сўнг шаҳар марказида ICE’нинг шафқатсиз усулларини қоралаган 300 дан ортиқ намойишчилар тўпланди. АҚШ президенти Доналд Трампнинг ноқонуний иммиграцияга қарши кенг кўламли кампанияси доирасида АҚШнинг қатор шаҳарларида мигрантларни қўлга олиш бўйича рейдлар ўтказилмоқда.

Лос-Анжелес полицияси намойишчиларни кечки соат еттигача тарқалишга чақирди, аммо вазият кескинлашишда давом этди, деб ёзади Los Angeles Times. Тўқнашувлар федерал бино яқинида ҳам содир бўлган. Полицияга кўра, намойишчилар бетон бўлакларини улоқтира бошлагач, ҳуқуқ-тартибот идоралари ходимларига «ўлимга олиб келмайдиган воситалар»дан фойдаланишга рухсат берилган.

Доналд Трамп маъмурияти Лос-Анжелес шаҳрида Миллий гвардиянинг 2 минг нафар ҳарбий хизматчиси сафарбар этилганини маълум қилди. Пентагон раҳбари армия кучлари ишга солиниши эҳтимолини истисно қилмаган.

Калифорния губернатори Гавин Невсом бу қарорни ортиқча ҳаракат деб ҳисоблаб, у фақат кескинликни кучайтиради, дея танқид қилди. Оқ уй эса унинг мурожаатини рад этди.

АҚШ Ички хавфсизлик котиби Кристи Ноэм ўз интервьюсида 2020 йил Жорж Флойд ўлдирилганидан кейин юзага келган норозилик намойишларини эслатиб, Миллий гвардия сафарбарлигини оқлади ҳамда 2020 йил воқеалари такрорланишига йўл қўймаймиз, деди.

Трамп ижтимоий тармоқларда Калифорния демократ раҳбариятини ва намойишчиларни кескин танқид қилди. Унинг сўзларига кўра, булар оддий намойишчилар эмас, балки пул тўланган исёнчилар.

Яна бир постида Трамп Калифорния губернатори Гавин Невсом ва Лос-Анжелес мэри Карен Бассни танқид қилиб, улар шаҳар аҳолиси олдида ўзларининг аянчли бошқаруви учун узр сўраши кераклигини ёзган.

АҚШ Иммиграция ва божхона полицияси (ICE) федерал агентлари кетма-кет иккинчи кун Лос-Анжелеснинг жануби-шарқидаги Парамоунт туманида намойишчилар билан тўқнашди, у ерда баъзи намойишчилар Мексика байроқларини кўтарган. Шанба куни кечқурун Лос-Анжелес марказидаги яна бир норозилик намойишида 60 га яқин одам тўпланди, улар «ICE, Лос-Анжелесдан чиқиб кет!» қабилидаги шиорларни айтишган.

Россия Харкив бўйлаб уруш давридаги энг йирик зарбани йўллади

Россия армияси қаторасига иккинчи кеча Украина регионларига ракеталар ва дронлар билан ҳужум уюштирди. Зарбаларнинг асосий нишонларидан бири Харкив бўлган. Россия 48 та дрон, бешта авиабомба, тўртта реактив снаряд ва учта ракета қўллаган ҳолда шаҳар бўйлаб ёпирилма зарбалар йўллаган, деб хабар берди област маъмурияти раҳбари Олег Синегубов. Харкив мэри Игор Терехов бу шаҳар кенг кўламли уруш бошланганидан буён учраган энг кучли ҳужум бўлганини маълум қилган.

Дронлардан бири урилиши оқибатида Харкивдаги тўққиз қаватли уй жиддий шикастланган. Ҳужум туфайли еттинчи, саккизинчи ва тўққизинчи қаватлардаги 12 квартирада ёнғин чиққан, ёнғиннинг жами майдони 600 метр квадратни ташкил этган. Харобалар остидан бир аёл чиқариб олинган.

Украина расмийларига кўра, ҳужум оқибатида Харкивдаги корхоналардан бирида йирик ёнғин содир бўлган. Корхонага жами 40 дрон, тўртта авиабомба ва битта ракета қўллаган ҳолда ҳужум уюштирилган. Тўртта цехга зарба келиб тушган. Вайроналар остида одамлар қолган бўлиши мумкин, област прокуратурасига кўра, олти киши ичкарида қамалиб қолган.

Сўнгги маълумотларга кўра, Харкивда уч киши ҳалок бўлган, 21 киши, жумладан, бир чақалоқ ва 14 ёшли қиз жароҳатланган. Харкив областининг Купянск шаҳри ўққа тутилиши вақтида тинч аҳоли вакили бўлган 64 ёшли киши яраланган.

ОАВ: Илон Маск Оқ уйда молия вазири билан ёқалашиб кетган

The Washington Post газетаси Маскнинг АҚШ молия вазири Скотт Бесcент билан тўқнашуви ҳақида ёзди: тадбиркор унинг «кўкрак қафасига елкаси билан зарба берган». Ижтимоий тармоқ фойдаланувчилари унинг ўнг кўзи атрофи кўкарганини шу жанжал билан боғламоқда.

АҚШ президентининг собиқ маслаҳатчиси Стив Бэннон апрел ойида Оқ уйда миллиардер Илон Маск ва молия вазири Скотт Бессент ўртасидаги оғзаки тортишувдан сўнг ўртада жанжал келиб чиққанини маълум қилди. Овал кабинетдан чиқишдаги йўлакда давом этган баҳс пайтида Бессент Маскка шундай деган: «Сен фирибгарсан. Ғирт фирибгар».

Шунда Маск регби ўйинчиси каби Бессентнинг кўкрак қафасига елкаси билан зарба беради, Бессент эса унга жавоб қайтаради, дейди Бэннон. Унинг сўзларига кўра, бир неча киши уларни ажратиш учун аралашган ва кейин Маск Оқ уйнинг Ғарбий қанотидан «чиқариб юборилган». Доналд Трамп муштлашув ҳақида эшитиб, «Бу энди ҳаддан ошиш», деганди, дея қўшимча қилади Бэннон.