АҚШда «допинг ўйинлари» ўтказилади

Мусобақаларда Бутунжаҳон антидопинг агентлиги (WADA) томонидан тақиқланган моддалардан фойдаланишга рухсат берилади.

Фото: The Guardian

Лас-Вегасда спорт мусобақалари бўлиб ўтади, унда спортчиларга тақиқланган моддаларни истеъмол қилишга рухсат берилади, ҳатто допинг препаратларини қўллаш тавсия этилади. Бу ҳақда The Guardian хабар берди.

Тарихдаги биринчи Enhanced Games 2026 йил 21–24 май кунлари бўлиб ўтиши кутилмоқда. Мусобақа дастурига югуриш, сузиш ва оғир атлетика киради. Атлетлар жаҳон спортида тақиқланган дори воситаларидан тўлиқ фойдаланиш имкониятига эга бўладилар.

Enhanced Games спорт ва илм-фандаги инқилоб ва элита мусобақаларида фармацевтика билан технологик янгиликлар одатдаги ҳол бўлган келажак сифатида эътироф этилмоқда.

Мусобақа иштирокчилари анъанавий антидопинг тестларидан ўтмайди, аммо шифокорлар назоратида бўлади. Улар қандай моддаларни ишлатганини ошкор қилиши керак.

Enhanced Games иштирокчиларига катта мукофотлар ваъда қилинган. Масалан, 100 метрга югуриш ёки 50 метрга эркин усулда сузиш бўйича янги жаҳон рекорди учун 1 миллион доллар олиш мумкин.

Танлов сармоядорлари орасида кенжа Доналд Трамп бошчилигидаги 1789 Capital фирмаси ҳам бор.

Ўйинларни допингдан фойдаланган ҳолда ўтказиш ғояси расмий спорт органларининг норозилигига сабаб бўлди. «Бу хавфли масхарабозлик шоуси, ҳақиқий спорт эмас», деди АҚШ антидопинг агентлиги бош директори Трэвис Тайгерт.

Ушбу ўйинларда иштирок этишга рози бўлганлар орасида сузиш бўйича икки карра жаҳон чемпиони австралиялик Жеймс Магнуссен ҳам бор.

#АҚШ #спорт #допинг