Хитой Европада электромобиллар ишлаб чиқаришни хавф остига қўйди

ХХР томонидан нодир металлар экспортига нисбатан жорий этилган чекловлар сабаб июн ойидан электромобиллар ишлаб чиқариш тўхтатилиши мумкин.

Фото: DPA

Хитой томонидан нодир элементлар экспортига қўйилган чекловлар сабаб бутун дунёда электромобиллар ишлаб чиқариш жараёнлари хавф остида қолди, деб хабар беради Automobilwoche нашри.

Қайд этилишича, ушбу элементлар — электромоторларда ишлатиладиган доимий магнитлар ишлаб чиқаришда муҳим материал ҳисобланади.

Доимий магнит бўйича глобал ишлаб чиқариш бозорининг 90 фоизини ва қайта ишланадиган нодир металларнинг деярли барчасини назорат қиладиган Хитой экспортни бир ойдан ошиқ муддатга тўхтатиб қўйган. Бунга АҚШ билан савдо муносабатлари кескинлашгани сабаб бўлмоқда.

Экспертларнинг таъкидлашича, Европа ва Америка компаниялари 4-6 ҳафталик захираларга эга, аммо тайёр модуллар етишмовчилиги ҳозирдан кузатилмоқда. Етказиб беришлар қайта тикланмаса, электромобил ишлаб чиқариш июн ўрталарига бориб тўхтатилиши мумкин.

Таҳлилчиларнинг фикрича, ушбу инқироз 2021-2022 йилда кузатилган чиплар дефицитидан ҳам кучлироқ зарар етказиши мумкин, чунки у Европа фаол равишда ривожлантираётган электромобил инфратузилмасига катта таъсир кўрсатади.

Аввалроқ АҚШ президенти Доналд Трампнинг Хитой билан музокаралар асосида ўзаро тариф ставкаларини ўзгартириш тўғрисидаги фармонига кўра, Қўшма Штатлар Хитой экспорти учун тарифларни 120 фоиздан 54 фоизга ўзгартиргани тўғрисида хабар берилганди.

#Хитой #электромобиллар