АҚШ Космик кучлари «Олтин гумбаз»ни яратиш 1,5 трлн доллардан ортиққа тушишини баҳолади

Америка Космик кучлари штаб бошлиғининг таъкидлашича, Конгресс ажратишни режалаштираётган 542 млрд доллар ушбу тизимни ишга туширишга етмайди.

Фото: AP

АҚШ президенти Доналд Трамп томонидан таклиф қилинган «Олтин гумбаз» ракеталарга қарши мудофаа тизими дастурини яратиш учун 1,5 триллион доллардан ортиқ маблағ керак бўлади. Бу ҳақда Америка Космик кучлари штаб бошлиғи генерал Бредли Ченс Залцман маълум қилди.

Хавфсизлик бўйича конференцияда чиқиш қилган Залцман АҚШ Конгресси ракеталарга қарши мудофаа тизимини яратиш учун ажратиш режалаштирилаётган 542 миллиард долларлик бюджет маблағлари етарли эмас.

«Қўшимча молиялаштириш талаб этилади», — дейди генерал.

Унинг таъкидлашича, дастур паст ва ўрта Ер орбитасида сунъий йўлдошлар архитектурасини яратишни ўз ичига олади — бу Хитой ва Россия каби давлатларнинг гипертовушли ракеталари ҳамда бошқа мураккаб таҳдидларини аниқлаш, кузатиш ҳамда яксон этиш учун зарур.

«Олтин гумбаз» дастури АҚШ собиқ президенти Роналд Рейганнинг Ядро ҳужумидан мамлакатни ҳимоя қилишга қаратилган Стратегик мудофаа ташаббуси билан солиштирилмоқда. Ўша пайтдаги ракеталарга қарши мудофаа дастури ниҳоят юқори харажатлар ва технологик чекловлар сабабли муваффақиятсизликка учраган эди.

Залцманнинг айтишича, «Олтин гумбаз» лойиҳаси ҳали ишлаб чиқилиш босқичида. Асосий режа тайёр бўлгач, у мудофаа вазири Пит Ҳегсетга топширилади ва у орқали Оқ уй тасдиғига тақдим этилади.

Аввалроқ Илон Маскнинг SpaceX компанияси ва унинг икки шериги янги авлод «Олтин гумбаз» ракеталарга қарши тизимини яратишга асосий номзодларга айлангани тўғрисида хабар берилганди.

#АҚШ #«Олтин гумбаз»