Британия бош вазирининг уйида ёнғин чиқди — The Times

Лондон полицияси Буюк Британия бош вазири Кир Стармернинг уйида юз берган ёнғин бўйича тергов бошлади, деб хабар беради The Times.

Қайд этилишича, қиймати 2 миллион фунт турадиган уйда ёнғин бугун, 12 май куни чиққан. «Соат 01:35 да полиция Лондон шимолидаги уйда ёнғин содир бўлаётгани тўғрисида хабардор қилинди. Полициячилар воқеа жойига етиб келди. Ёнғин уйнинг эшикларига зарар етказган. Жабрланганлар йўқ», — дея Скотленд-Ярд баёнотидан иқтибос келтиради газета.

Баёнотда таъкидланишича, ҳолат юзасидан тергов давом этмоқда, воқеа жойи ўраб олинган. Полиция ёнғиннинг келиб чиқиш сабабини эълон қилмаган.

Британия бош вазирининг шахсий уйи бир неча бор норозилар ҳужумига учраган. Хусусан, ўтган йили Стармернинг уйи олдида ўтказилган намойишлар учун уч киши судланган.

Кир Стармер бош вазир лавозимига киришгач, турмуш ўртоғи билан Британия ҳукумати раҳбарининг Даунинг-стритдаги расмий қароргоҳига кўчиб ўтган. Маълумотларга кўра, бош вазирнинг шахсий уйи ижарага берилган.