Ҳуснбузарларга қарши биринчи вакцинанинг клиник синовлари бошланди

Sanofi фармацевтика компанияси ҳуснбузарларга қарши вакцинанинг клиник синовлари бошланганини эълон қилди. Тадқиқотда юздаги тошмаларнинг оғир шакли кузатилган катта ёшли инсонлар иштирок этмоқда, деб хабар беради Live Science.

Қайд этилишича, вакцина 18-45 ёш оралиғидаги 400 нафар кўнгилли ўртасида синовдан ўтказилади. Иштирокчилар учтагача инъекция олади, назорат гуруҳига эса плацебо юборилади. Айни вақтда синов натижалари тўғрисида маълумот йўқ. Sanofi режасига кўра, синовлар 2027 йилгача давом этади.

Мазкур дори воситаси мРНК-вакцина ҳисобланади. Компаниядагиларнинг таъкидлашича, вакцина ҳуснбузарларни қўзғатиш билан боғлиқ айрим оқсилларга қарши иммунитетни ҳосил қилиши керак. Ҳозирча унинг таъсир механизми тафсилотлари ошкор этилмаяпти.

Нашрнинг ёзишича, вакциналар яратилиб, клиникаларда пайдо бўлгунга қадар одатда 10 йилга яқин вақт ўтади. Синовлар ижобий натижа кўрсатган тақдирда ҳам олдинда кўп босқичли хавфсизлик ва самарадорлик текширувлари мавжуд. Sanofi’дан ташқари, ҳуснбузарларга қарши вакциналар устида бошқа тадқиқот гуруҳлари ҳам иш олиб бормоқда, аммо Франция компанияси биринчи бўлиб кенг кўламли клиник синовларга ўтди.