Ватикан Рим папасининг ўлими сабаби ва унинг васиятини эълон қилди

«Қабр ерда, оддий, ортиқча безакларсиз бўлиши, унга фақат «Франциск» ёзуви туширилиши керак», — дейилади понтифик васиятида.

Фото: Reuters

Рим папаси Франциск кома ва ундан кейин юрак тўхташига олиб келган инсулт оқибатида вафот этди. Бу ҳақда Ватикан соғлиқни сақлаш бўйича директори Андреа Арканжели маълум қилди.

Рим папаси Франциск 2025 йил 21 апрел куни, Ватикандаги қароргоҳи — Каса-Санта-Мартада оламдан ўтди. У 88 ёшда эди.

2025 йил феврал ойи ўрталарида Рим папаси Франциск бронхит ташхиси билан шифохонага ётқизилганди. Кейинроқ унинг ҳолати кескин оғирлашган — унда икки томонлама пневмония аниқланган ва бир неча бор сунъий нафас олдириш аппаратига уланганди. 23 март куни Франциск 38 кун давомида шифохонада қолганидан кейин Ватиканга қайтган эди. 20 апрел куни у Ватикандаги Авлиё Пётр майдонига йиғилган жамоат қаршисида кўриниш бериб, уларни Пасха билан табриклаганди.

Рим папаси билан видолашув 23 апрел куни Авлиё Пётр саборида бўлиб ўтади. Францискнинг дафн маросими 25-27 апрел оралиғида ўтказилиши мумкин. Аниқ санани католик черкови кардиналлари белгилайди.

Рим папаси Франциск 2022 йил июнда васиятнома ёзган бўлиб, унда ўзининг Санта-Мария-Мажоре базиликасида дафн этилишини хоҳлашини билдирган. Понтифик маросимга тайёргарлик кўриш учун маблағни хайрия қилувчилардан олишни буюрган.

Шунингдек, Франциск ўзининг келажакдаги қабри тузилишини ҳам тасвирлаб кетган. «Қабр ерда, оддий, ортиқча безакларсиз бўлиши, унга фақат «Франсиск» ёзуви туширилиши керак», — дейилади понтифик васиятида.

#Рим папаси #Франциск