Кремл АҚШни «катта битим»га жалб қилиб, Трампни қизиқтирадиган таклифларни қидирмоқда — ОАВ

Россия АҚШ билан Украинадаги урушни тўхтатиш бўйича музокаралар доирасида глобал таъсир доираларини қайта тақсимлашни кўзда тутувчи «катта битим»га эришишга интилмоқда. Бу ҳақда россиялик амалдор ва дипломатлар орасидаги манбаларига таяниб, The Moscow Times хабар берди.

Кремл режаларига кўра, бундай келишув Вашингтон томонидан Россиянинг собиқ совет ҳудудлари, жумладан, Украина устидан таъсир доираси, шу билан бирга, Москванинг Европадаги таъсири ҳам тан олинишини англатади.

Ушбу мақсадга эришиш учун Кремл АҚШ президенти Доналд Трампнинг эътиборини жалб қилиш ва ушлаб қолиш йўлларини изламоқда. The Moscow Times маълумотларига кўра, Трампга мўлжалланган бир қанча таклифлар тайёрланяпти — нодир металлар бўйича битимлардан тортиб, Шимолий Корея ва Эрон устидан босим воситалари ҳамда Москва-Сити ҳудудида Trump Tower қурилишигача. Таклифлар Трамп учун шахсий жиҳатдан қизиқарли, бир президентлик муддатида амалга ошириладиган ва медиа учун жозибадор бўлиши лозим.

«Асосийси — улар [америкаликлар] ишимизга аралашмасин, бизга қандай яшашни ўргатмасин. Улар биз қилаётган ишга халақит бермасликлари керак», — дейди Кремл музокаралари мантиғидан хабардор юқори лавозимли россиялик амалдор.

Манбаларга кўра, Кремл амалдорлар ва экспертларга Трампни қизиқтириши мумкин бўлган иқтисодий ҳамкорлик таклифларини ишлаб чиқишни топширган. Хусусан, Вашингтон билан иқтисодий ҳамкорлик тайёрлаш таклифи Россиянинг йирик корпорацияларига ҳам буюрилган. Ушбу компаниялар орасида «Росатом», «Роснефт», «Полюс», «Русал» ва бошқалар бор. Уларнинг фаолиятини президент маъмуриятининг раҳбари ўринбосари Максим Орешкин ҳамда Путиннинг махсус вакили Кирилл Дмитриев мувофиқлаштирган.

Москва Украинадаги урушни энг катта «кузири» деб билади ва Трампнинг ўт очишни тўхтатиш истагидан фойдаланмоқчи. «Биз Трампдан максимал даражада фойда олишимиз керак», — дейди нашр суҳбатдоши.

Бироқ айрим дипломат ва амалдорлар бу имкониятнинг нозиклигини таъкидлаяпти, чунки Трамп музокараларга қизиқишини йўқотиши ёки Россиядан хафа бўлиб қолиши мумкин.

Бошқалар эса нисбатан оптимистик фикрда. «Биз тўғри йўлдамиз. АҚШ билан муносабатларни қайта қуриш устувор вазифа — бу осон эмас, айни вақтда Украинага оид мулоқотни сақлаб қолиш муҳим. Кейинги қадамлар жойлардаги вазиятга қараб белгиланади. Асосийси — вақт, сабр ва танланган йўлдан чекинмаслик», — дейди россиялик дипломатлардан бири.