Шавкат Мирзиёев Рим папаси Францискнинг вафоти муносабати билан ҳамдардлик йўллади

Ўзбекистон президенти Шавкат Мирзиёев Рим папаси Франсискнинг вафоти муносабати билан Рим-католик черкови камерленгоси кардинал Кевин Фарреллга ҳамдардлик йўллади.

Давлат раҳбари ўз мактубида Руҳоний Ҳазратлари Ўзбекистон ва Ватикан ўртасидаги алоқаларни ривожлантириш, динлар ва конфессиялараро дўстликни мустаҳкамлаш, бутун жаҳонда муҳтож инсонларни қўллаб-қувватлаш, эзгу ғояларни кенг тарғиб этиш ишига муносиб ҳисса қўшганини таъкидлади.

Президент Ватикан халқига, ер юзидаги бутун католик аҳлига чуқур таъзия ва ҳамдардлик туйғуларини изҳор этди.

Рим папаси Франциск 2025 йил 21 апрел куни, Ватикандаги қароргоҳи — Каса-Санта-Мартада оламдан ўтди. У 88 ёшда эди. Кардинал Кевин Фаррелл Ватикан телеканали орқали папанинг ўлими ҳақида расман хабар берган.

Эслатиб ўтамиз, 2025 йил феврал ойи ўрталарида Рим папаси Франциск бронхит ташхиси билан шифохонага ётқизилганди. Кейинроқ унинг ҳолати кескин оғирлашган — унда икки томонлама пневмония аниқланган ва бир неча бор сунъий нафас олдириш аппаратига уланганди. Кардинал Жанфранко Равази «агар папалик вазифаларини бажариш билан боғлиқ мураккабликлар юзага келадиган бўлса», Франциск тахтдан воз кечиши мумкинлигини айтган эди.