АҚШ Олий суди венесуэлалик мигрантлар депортациясини тўхтатиб қўйди

Ҳибсга олинган мигрантлар Қўшма Штатларда террорчилик ташкилоти дея тан олинган «Трен-де-Арагуа» гуруҳига алоқадор эканликда айбланмоқда.

Фото: REUTERS

АҚШ Олий суди Америка фуқаролик эркинликлари иттифоқи (ACLU) даъвосини қабул қилди ва ҳукуматга венесуэлалик мигрантларни депортация қилишни вақтинча тақиқлади. Президент Доналд Трамп маъмурияти даъвони рад этишни талаб қилди.

Венесуэлалик мигрантлар гуруҳи АҚШда террорчилик ташкилоти дея тан олинган «Трен-де-Арагуа»га алоқадор эканликда айбланмоқда. Уларни Қўшма Штатлардан депортация қилиш қарори ташқи душманлар тўғрисидаги қонун асосида қабул қилинган — у мигрантларни суд қарорисиз мамлакатдан чиқариб юбориш имконини беради. Ушбу қонундан охирги маротаба Иккинчи жаҳон уруши вақтида фойдаланилган.

«Улар [венесуэлалик мигрантлар] яқинда Адлия ва Ички хавфсизлик вазирликлари томонидан яхшилаб режалаштирилган ҳамда амалга оширилган рейдлар давомида ҳибсга олинган», — дейди Трампнинг маслаҳатчиси Стивен Миллер.

Қўлга олинган венесуэлалик мигрантларнинг барчаси Техасдаги Блубоннет қамоқхонасида сақланмоқда. Уларнинг аниқ сони номаълум. ACLU ўз даъвосида кўрсатишича, депортация тўғрисидаги қарор қўлга олинганларнинг «Трен-де-Арагуа» гуруҳига алоқаси исботланмай туриб қабул қилинган.

Эслатиб ўтамиз, март ойида Венесуэла президенти Николас Мадуро ва АҚШ президенти Доналд Трамп мигрантларни депортация қилиш тўғрисида келишувга эришган эди. Венесуэлага репатриация феврал ойида тўхтатилганди, бунга Оқ уй раҳбари Chevron компаниясини Жанубий Америка давлатида фаолият юритиш лицензиясидан маҳрум қилгани сабаб бўлган. Ўз навбатида Мадуро ҳукуматга АҚШда қўлга олинган венесуэлалик мигрантлар репатриацияси учун зарур бўладиган рейслар сонини оширишни буюрган.

#АҚШ #Венесуэла #депортация