Инсон ҳуқуқлари бўйича 2030 йилгача бўлган миллий стратегия тасдиқланади 

Қуйидагилар Ўзбекистоннинг инсон ҳуқуқларини ҳимоя қилишнинг устувор йўналишлари этиб белгиланади:

• Ўзбекистоннинг инсон ҳуқуқлари соҳасидаги халқаро мажбуриятларини, шунингдек, БМТнинг устав органлари ва шартномавий қўмиталарининг тавсияларини ҳисобга олган ҳолда инсон ҳуқуқлари соҳасидаги қонунчиликни янада такомиллаштириш;
• 2030 йилгача бўлган даврда Ўзбекистоннинг Барқарор ривожланиш мақсадларига эришиш ҳамда инсон ҳуқуқлари ва эркинликлари кафолатларини таъминлаш бўйича саъй-ҳаракатлар узвийлигини таъминлаш;
• болалар, ёшлар, аёллар, ногиронлиги бўлган шахслар ва аҳолининг бошқа ижтимоий эҳтиёжманд тоифалари вакиллари ҳуқуқларини ҳимоя қилиш тизимини кучайтириш, инклюзив жамият асосларини ривожлантириш;
• инсон ҳуқуқлари соҳасида парламент ва жамоатчилик назоратини амалга ошириш тизимини янада яхшилаш, Ўзбекистоннинг инсон ҳуқуқлари соҳасидаги халқаро шартномалари бажарилишини мониторинг қилишда  инсон ҳуқуқлари бўйича миллий институтлар ва нодавлат нотижорат ташкилотларнинг ўзаро ҳамкорлигининг қонунчилик асослари ва ҳуқуқий амалиётини кучайтириш;
• шахсий, сиёсий, иқтисодий, ижтимоий, маданий ва экологик ҳуқуқларни ҳимоя қилишда давлат ҳокимияти ва бошқаруви органлари, фуқаролик жамияти институтлари, оммавий ахборот воситалари фаолиятининг очиқлиги ва ўзаро ҳамкорлиги самарадорлигини таъминлаш;
• Ўзбекистоннинг инсон ҳуқуқлари соҳасидаги халқаро мажбуриятлари бажарилишини таъминлашда халқаро ташкилотлар билан ҳамкорлик қилиш ва инсон ҳуқуқлари бўйича миллий институтларнинг фаолиятини такомиллаштириш.

Фармонда белгиланган чора-тадбирларнинг сифатли ва ўз вақтида бажарилишини мувофиқлаштириш ва мониторинг қилишнинг қуйидаги тартиби ўрнатилади:

а) вазирлик ва идоралар ҳар чоракда ҳисобот давридан кейинги ойнинг 5-санасига қадар Инсон ҳуқуқлари бўйича Ўзбекистон Миллий марказига фармон билан тасдиқланган стратегия ва «Йўл харитаси»да назарда тутилган чора-тадбирларни амалга ошириш тўғрисида ҳисобот тақдим этадилар. Бунда, вазирлик ва идораларнинг биринчи раҳбарлари «Йўл харитаси»да белгиланган вазифаларнинг тўлиқ, сифатли ва ўз вақтида амалга оширилиши учун шахсан жавобгардир;
б) Марказ Миллий стратегия ва «Йўл харитаси»нинг амалга оширилиши юзасидан:
мунтазам мониторинг олиб бориб, чора-тадбирлар сифатли ва ўз вақтида ижро этилиши бўйича таклиф ва тавсияларни тегишли вазирлик ва идораларга киритиб боради;  
доимий равишда аниқ кўрсаткичлар ва эришилган натижалар акс эттирилган батафсил ахборотни ўз веб-сайтида жойлаштириб боради;
ҳар олти ойда Ўзбекистон президенти администрацияси ва Олий Мажлис палаталарига умумлаштирилган маълумот киритади;
ахборот-таҳлилий шарҳлар тайёрланиши, хорижий тилларга таржима қилиниши ва эълон қилинишини таъминлайди.

Қуйидагиларга:

а) Олий Мажлиснинг Инсон ҳуқуқлари соҳасида халқаро мажбуриятларга риоя этилиши бўйича парламент комиссиясига вазирлик ва идоралар раҳбарларининг миллий стратегия ва «Йўл харитаси»нинг ижро ҳолати юзасидан ахборотини ҳар ярим йилда эшитиш ва танқидий муҳокама қилиш;
б) Қорақалпоғистон Республикаси Жўқорғи Кенгеси, вилоятлар ва Тошкент шаҳар халқ депутатлари кенгашларига вазирлик ва идоралар ҳудудий бўлинмалари раҳбарларининг миллий стратегия ва «Йўл харитаси»нинг ҳудудлар кесимида ижро этилиши юзасидан ахборотини эшитиш ва танқидий муҳокама қилиш тавсия этилади.