Наманганда ЙПХ машинаси билан тўқнашган Cobalt ҳайдовчиси қарийб 2 ойдан бери комада ётгани маълум бўлди

2025 йилнинг 19 феврал куни эрталаб Поп тумани ҳудудида Cobalt ва ЙПХ машинаси иштирокида ЙТҲ содир бўлган. Бу ҳақда Kun.uz’га Cobalt ҳайдовчисининг яқинлари маълум қилди.

Хизмат машинаси ЙПХ ходими Фарҳод Мамажонов бошқарувида бўлган. ЙТҲ оқибатида Cobalt ҳайдовчиси, 1983 йилда туғилган Баҳром Дадабоев оғир тан жароҳати олган ҳамда шифохонанинг жонлантириш бўлимига ётқизилган.

“Шундан бери кома ҳолатида ётибди, аҳволи оғир. Шифокорлар яқинда кўзини очиб-юма бошлаганини айтишганди, бироқ яна оғирлашиб қолди”, дейди ҳайдовчининг яқин қариндоши Kun.uz журналисти билан суҳбатда.

Баҳром Дадабоевнинг яқинлари ЙПХ ходими хабар олмагани, кўмак бермаётганини айтиб, норозилик билдирмоқда.

Kun.uz ҳолатга ойдинлик киритиш мақсадида ЙҲХХ матбуот хизмати раҳбари Зойир Йўлдошев билан боғланди. Унинг билдиришича, ходим хизмат машинасини ўз йўналишида бошқариб кетаётган бўлган. Асосий йўлдан ички йўлга бурилаётган Cobalt машинаси бехосдан унинг йўлига чиққан.

“ЙПХ ходими инсонийлик юзасидан Cobalt ҳайдовчиси ҳолидан хабар олиш мақсадида шифохонага борган. Бироқ унинг яқинлари жанжал кўтаргани боис қайтиб бормаган”, дейди Зойир Йўлдошев.

Қўшимча қилинишича, ЙПХ ходими Фарҳод Мамажоновга нисбатан хизмат текшируви ўтказилган ҳамда унинг ҳаракатларида жиноят аломатлари йўқ деб топилган.