Фарғонада 120 млн долларга металлургия заводи қурилади

Фарғона вилоятининг Тошлоқ туманидаги «Тараққиёт» саноат ҳудудида Хитойнинг Shandong Aipurui Steel Plate Co., Ltd компанияси билан ҳамкорликда метални қайта ишлаш заводи барпо этилиши кўзда тутилган.

Вилоят ҳокими Хайрулла Бозоров компания раҳбари Хан Сзунбай бошчилигидаги делегация билан учрашувни амалга оширди.

Қиймати 120 миллион доллардан ортиқ бўлган завод уч босқичда қурилиб, 500 та янги иш ўрни яратилади. Биринчи босқични октябр ойида ишга тушириш режалаштирилган.

Заводда қайта ишланган металлдан ишлаб чиқариладиган сифатли ва рақобатбардош маҳсулотлар ҳам ички бозорга, ҳам экспортга йўналтирилади.

Инвестор Хан Сзунбай заводда амалга оширилаётган қурилиш ишлари ва энг замонавий технологиялар жорий этилгани ҳақида сўзлаб берди. Вилоят ҳокими Хайрулла Бозоров лойиҳа бўйича ишлар жадал кетаётгани, нафақат ишлаб чиқариш, балки бизнес-форумлар ўтказиш учун ҳам шароитлар яратилаётганини таъкидлади.

Шунингдек, вилоят раҳбари «Яшил макон» умуммиллий лойиҳаси доирасида ҳудудда яшил ҳудудлар яратилаётганини таъкидлади.

Shandong Фарғона вилоятида бошқа лойиҳаларни ҳам амалга оширмоқда. Масалан, Shandong Weida Construction Machinery Co., Ltd. компанияси вилоятнинг Данғара туманида қурилиш материаллари (газобетон блоклари) заводини қуришни режалаштирмоқда.

Shandong Swan Cotton Industrial Machinery компанияси пахта териш машиналарини йиғиш, техник хизмат кўрсатиш ва механизаторлар учун ўқув марказини ташкил этади.