Панама мамлакат портларини ҳонгконгликлар бошқарувига топширган амалдорларни судга беради

Панама Контроллер бош бошқармаси Ҳонгконгга тегишли CK Hutchison компанияси билан канал портларидан фойдаланиш бўйича шартномани узайтирган амалдорларни судга беради. Бунга аудитор Ҳонгконг фонди томонидан кўплаб қонунбузарликлар содир этилганини аниқлагани сабаб бўлган.

Март ойи бошида CK Hutchison компанияси Панама канали портлари инфратузилмасидаги 90 фоиз улушини ва дунёнинг 23 мамлакатида жойлашган 43 та денгиз портига эгалик қилувчи Hutchison Port Holdings компаниясидаги 80 фоиз улушини АҚШнинг BlackRock фонди бошчилигидаги инвесторлар консорциумига сотганини маълум қилган эди. Битим суммаси — 22,8 миллиард долларни ташкил этган.

Панама бош назоратчиси Анел Флореснинг маълум қилишича, Panama Ports Company билан 2001 йилда тузилган иккита порт шартномаси текширилганида кўплаб қонунбузилиш ҳолатлари аниқланган. Бундан ташқари, аудитор CK Hutchison томонидан тўловлар ўз вақтида амалга оширилмаганини, бухгалтерия ҳисобидаги хатоликлар ва аввалига Ҳонгконг компанияси рад этган «яширин» операцияларни аниқлашга муваффақ бўлган. Амалдорнинг сўзларига кўра, Панамага етказилган зарар қарийб 300 миллион долларни ташкил этади.

Текширув натижалари яқин кунларда эълон қилинади. Агар шартнома шартлари ва Ҳонгконг компанияси фаолияти ноқонуний бўлган дея топилса, BlackRock билан тузилган битим блокланади.

Мазкур битим тузилишига олдинроқ Панама прокуратураси қарши чиққанди — улар буни конституцияга қарши деб атаган. Март охирларида Хитой давлат бозорини тартибга солиш бошқармаси ушбу битим бўйича ўзининг антимонополия терговини бошлаган эди.