Зеленский АҚШ Россия талабларига ён бермаслигига умид қилмоқда

Москва Қора денгизда кемалар қатновини хавфсиз қилиш имконини берувчи сулҳ Ғарбнинг Россиядан озиқ-овқат ва ўғитлар савдосига қўйган чекловлари бекор қилинганидан кейингина кучга киришини маълум қилган.

Украинани қўллаб-қувватлаш коалицияси саммитида иштирок этиш учун Парижга ташриф буюрган Зеленский чоршанба куни кечқурун журналистлар билан суҳбатлашди.

BBC халқаро муҳаррири Жереми Боуэннинг АҚШ Москванинг талабларига қаршилик кўрсата оладими, деган саволига жавоб бераркан, у шундай деди: «Мен бунга умид қиламан. Худо хоҳласа, уддалашади. Лекин кўрамиз».

Оқ уй сешанба куни Россия ва Украина делегациялари Саудия Арабистонида АҚШ расмийлари билан уч кунлик алоҳида музокаралардан сўнг Қора денгизда ўт очишни тўхтатишга келишиб олганини маълум қилди.

Аммо бир неча соат ўтгач, Кремл ўз шартлари рўйхатини ўз ичига олган баёнотини эълон қилди.

Москва талаблари қаторида Ғарбнинг қишлоқ хўжалиги маҳсулотлари савдоси билан шуғулланувчи молия муассасаларига нисбатан санкцияларини бекор қилиш ва уларнинг Swift халқаро тўлов тизимига киришини тиклаш ҳам бор.

АҚШ президенти Доналд Трамп Вашингтондагилар Москванинг чекловларни бекор қилиш ҳақидаги сўровини кўриб чиқаётганини айтди.

Евроттифоқдагилар эса санкцияларни бекор қилиш ҳақида гапиришга ҳали эрта эканини айтишмоқда.

«Биз санкцияларни бекор қилмоқчи эмасмиз, шундай экан, бунга ҳали жуда эрта. Нима бўлганда ҳам, санкциялар Россиянинг тажовуз фойдасига танлов қилгани туфайли ва шунинг учун уларни бекор қилиш фақат Россиянинг халқаро ҳуқуққа риоя қилиш фойдасига танлов қилишига боғлиқ», – деди Франция президенти Эммануэл Макрон Парижда Зеленский билан музокаралардан сўнг.

Макрон Россияни янги шартларни илгари суришда ва ўт очишни тўхтатиш таклифларига реакция кўрсатмасликда айблади.

Парижда журналистлар қаршисида нутқ сўзлаган Зеленский АҚШдаги иккала партиядан ҳам қўллаб-қувватлов учун жуда миннатдор эканини айтди, бироқ Американинг айрим расмийлари Россия нарративлари таъсирида эканидан хавотир билдирди.

«Биз бу нарративларга қўшила олмаймиз», – деди у.

Зеленский АҚШ президенти Доналд Трамп у ва Россия президенти Владимир Путиндан қайси бири билан яқинроқлиги ҳақидаги саволга жавобан, буни билмаслигини айтди.

«Мен унинг реал муносабатлари қандайлигини билмайман, улар [Трамп ва Путин] қанча суҳбатлашганини билмайман. Мен Трамп билан унинг Путин билан қанчалик яқинлигини тушунадиган даражада яқин эмасман», – деб қўшимча қилган Украина президенти.