Швейцария элчиси ишга таклиф билан боғлиқ фирибгарликлар ҳақида огоҳлантирди

Ўзбекистонда яшаб, Швейцарияда иш қидираётган бўлсангиз, фирибгарлик қурбони бўлиб қолишдан ўзингизни ҳимоя қилинг, деди у.

Фото: Швейцариянинг Ўзбекистондаги элчихонаси

Швейцариянинг Ўзбекистондаги элчихонасига сохта ишга таклиф қилиш ва қалбаки иш рухсатномалари билан боғлиқ мурожаатлар кўпайган. Бу ҳақда Швейцариянинг Ўзбекистондаги элчиси Константин Оболенский маълумот берди.

«Биз Швейцариянинг Тошкентдаги элчихонасида фирибгарликлар, жумладан, Швейцарияга ёлғон иш таклифлари ва сохта иш рухсатномалари ҳақида тез-тез эшитяпмиз. Шундай экан, Ўзбекистонда яшаб, Швейцарияда иш қидираётган бўлсангиз, фирибгарлик қурбони бўлиб қолишдан ўзингизни ҳимоя қилинг», деди у.

Элчининг таъкидлашича, иш таклифи келиб тушса, жуда эҳтиёт бўлиш ва унинг ҳақиқийлигини текшириш, бунинг учун Швейцариядаги иш берувчи билан боғланиш лозим.

«Жуда муҳим: ҳеч қандай шароитда пул тўламанг ёки ўтказманг! Агар иш таклифи ҳақиқий бўлса, ишлаш учун рухсатнома олиш иш берувчининг зиммасида бўлади. Иш визасини олиш учун Швейцариянинг Москвадаги элчихонасида жойлашган Минтақавий консуллик марказига шахсан ариза топшириш керак бўлади. Тошкентдаги элчихонага эмас! Агар жиноят қурбони ёки фирибгарлар билан алоқада бўлдим, деб ҳисобласангиз, бу ҳақда маҳаллий ички ишлар органига хабар беришни тавсия қиламиз», деди Оболенский.

#Швейцария #фирибгарлик #Константин Оболенский