«ПСЖ» эгалари яна бир клубни сотиб олмоқчи

Франциянинг «ПСЖ» футбол клубига эгалик қилувчи Qatar Sports Investments компанияси Испаниянинг иккинчи дивизионида ўйновчи «Малага» клубини сотиб олмоқчи.

Нашр манбасининг таъкидлашича, қатарликларнинг хоҳиши Малага шаҳри 2030 йилда Жаҳон чемпионати ўйинларини қабул қилиши билан боғлиқ. Компаниядагилар бу яна бир жозибадор бозор очилишини англатишига ишонмоқда.

«ПСЖ» — Франция чемпионати етакчиси. Жамоа 26 та ўйиндан сўнг 68 очко тўплаган бўлиб, энг яқин таъқибчидан 19 очко олдинда.

«Малага» — Андалусиядаги энг таниқли жамоалардан бири бўлиб, кучли ёшлар академиясига эга ва Испания футболида муҳим ўрин тутади. Клуб ўзининг энг ёрқин даврини 2010 йилларнинг бошида, қатарлик шайх Абдуллоҳ бин Носир Ал-Тани клубни сотиб олганидан кейин бошдан кечирган. Бироқ молиявий муаммолар сабабли 2018 йилда Ла Лигадан тушиб кетган ва ҳозирда юқори дивизионга қайтиш учун курашмоқда. Ҳозирда клуб Испания футболининг иккинчи дивизионида 15-ўринни эгаллаган. 32 та ўйиндан кейин жамоа ҳисобида 42 очко мавжуд.

2030 йилда футбол бўйича Жаҳон чемпионати Марокаш, Португалия ва Испанияда бўлиб ўтади. Ўйинларнинг учтаси Жанубий Америкада — Уругвай, Парагвай ва Аргентинада ўтказилади.