Ҳудудларда салкам 100 кг гиёҳвандлик воситалари ашёвий далил сифатида олинди

Унда, Сариосиё туманида яшовчи, муқаддам судланган шахс тожикистонлик наркокурерлар томонидан Узун тумани ҳудудидаги хуфия жойга қолдириб кетилган 82 кг 478 гр “опий” моддасини олиб, маҳаллий фермер хўжаликларидан бирининг нотурар биносига яшириб қўймоқчи бўлган вақтида ушланди. 

Аниқланишича, у 2 минг АҚШ доллари хизмат ҳақи эвазига, тожикистонлик наркосавдогарнинг кўрсатмасига асосан ушбу гиёҳвандлик воситасини келгусида белгиланган жойга етказиб бериши керак бўлган. 

ДХХ ва ИИВ ходимлари ҳамкорлигида Наманган вилоятининг Косонсой туманида ўтказилган тезкор тадбирда фуқаро синтетик гиёҳвандлик воситаларини “закладка” тарзида жойлаштираётган вақтида қўлга олинди.

Шунингдек, у ўз қайнонасининг яшаш хонадонида нарколаборатория ташкил қилганлиги аниқланиб, тинтув тергов ҳаракатлари давомида ушбу манзилдан 9 кг 450 гр “Мефедрон” синтетик гиёҳвандлик воситаси ашёвий далил сифатида олинди. 

Бундан ташқари, мазкур фуқаро томонидан мижозларга сотиш мақсадида хуфия жойларга қолдирилган жами 595 гр “Мефедрон” моддаси ҳам тегишли тартибда расмийлаштириб олинди. 

Бошқа ҳолатда эса Россиядан халқаро почта жўнатмалари орқали бошқа товар номи остида пластик идишда юборилган 7 кг 313 гр синтетик каннабиноид аналоги бўлган 5-Fluro-ADB гиёҳванд моддасини қабул қилиб олганларида Тошкент шаҳрида вақтинча яшовчи, Қашқадарё вилоятида туғилган 2 нафар шахс ДХХ ва Божхона қўмитаси ходимлари томонидан қўлга олинди.
 
Аниқланишича, улар WhatsАpp мессенжери орқали танишган номаълум профил эгаси топшириғига кўра, 500 АҚШ доллари эвазига ушбу ажал оғусини Тошкент шаҳридан Самарқанд вилоятига етказиб беришлари керак бўлган. 

Шундан сўнг, тезкор тадбир давом эттирилиб, мазкур наркотик моддани Самарқанд вилоятида қабул қилиб олган вақтларида Паст Дарғом туманида яшовчи 2 нафар фуқаро ҳам ушланди. 

Улардан бирининг Самарқанд шаҳридаги хонадони кўздан кечирилганда, синтетик гиёҳвандлик воситаларини тайёрлаш учун мўлжалланган яширин лаборатория ташкил қилинганлиги маълум бўлди. 

Ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, қамоқ эҳтиёт чораси қўлланган. Тергов ҳаракатлари олиб борилмоқда.