Тошкентда ёш қизалоқни муттасил калтаклаб келган энага озодликдан маҳрум қилинди

Тошкентда ёш қизалоқни мунтазам равишда калтаклаб келган ҳамда ўғрилик қилган энага жиноий жазога тортилди. Kun.uz суд ҳукми билан танишди.

Суд ҳужжатида келтирилишича, 1981 йилда туғилган, Тожикистон фуқароси бўлган С.Х. Тошкент шаҳрида савдо-сотиқ билан шуғулланувчи М.Р.нинг уйида 2 йил давомида энагалик қилиб келган. У ушбу даврда хонадон эгаси уйга савдо пулларини олиб келган вақтида унинг чалғиганидан фойдаланиб, ҳар сафар 1-2 млн сўмдан яшириб қолаверган. Энага ўғирлаган пуллар миқдори жами 118 млн сўмга етган. 

Бундан ташқари, С.Х. муттасил равишда М.Р.нинг 2022 йилда туғилган қизини калтаклаб келган. Аёл танасининг турли қисмларига урган ҳолда қизалоққа тан жароҳати етказган. Суд-тиббий экспертиза хулосасига кўра, қизалоқда “ўнг жағ ости соҳаси, ўнг сон юқори учлиги олд соҳаси, чап сон юқори учлиги олд юзасида қонталашлар” аниқланган ҳамда бу тан жароҳатлари қаттиқ ўтмас жисм таъсирида етказилган.   

Энага судда айбига қисман иқрорлик билдириб, қизалоқни асабини кўп бузганлиги сабабли урганини айтган. Шунингдек, у ўғирлаган пуллари миқдори 118 млн сўм эмас, 8 млн сўм атрофида эканлигини билдирган. 

“2022 йилда ушбу хонадонда хизматкорлик ва энагалик қила бошладим. Уй эгаси бу хизматларим учун 2,5 млн сўм ойлик иш ҳақи берарди. Икки болага қараб, уй ишларини қилардим. Уй эгаси соат тахминан 18:00 лар атрофида бозордан келарди. У уйга келганидан сўнг ён сумкасида кунлик савдо пулларини оларди. Ушбу пулларни тахлаб санашда унга ёрдамлашиб турардим. Ўзимга бирор нарса олиш мақсадида ўғрилик қилиш мақсади пайдо бўлди. 2022 йилдан бошлаб уй эгасининг савдо қилган пулларидан маълум миқдорда ўғрилик йўли билан олиб турдим. 

Уй эгасининг кичик қизи асабимни кўп бузганлиги учун қўлим билан доимий равишда бош, қорин ва тана қисмига урардим. Бир неча маротаба унинг бошига қўлимда бўлган телефон ёки телевизорнинг пулти билан урганман”, деган аёл ўз кўрсатмасида.

Жабрланувчининг судда билдиришича, у пули камайиб қолаётганлигини сезган ва энагани синаб кўришни мақсад қилган. У кунлик савдода тушган пулни бозорда санаб кўриб, миқдорини билган ҳолда уйига олиб борган ва пулларни санаб, тахлаб қўйишни энагага топширган. С.Х. эса пул миқдорига қараб, 500 минг сўмдан 2 млн сўмгача яшириб қолаверган.

Бундан ташқари, уй эгаси хонадонга яширин камера ўрнатган. Бу орқали энага кичкина қизини мунтазам уриб келишини ҳамда савдо пулларидан яшириб олиб қолаётганини фош этган.

Жиноят ишлари бўйича Учтепа туман судининг ҳукми билан С.Х. Жиноят кодексининг 169-моддаси (Ўғрилик) 3-қисми “в” банди ва 110-моддаси (Қийнаш) 2-қисми “а” бандида назарда тутилган жиноятни содир қилишда айбли деб топилган. Унга 5 йил 1 ой муддатга озодликдан маҳрум қилиш жазоси тайинланган. Шунингдек, С.Х.дан жабрланувчи фойдасига етказилган зарарни ундириш белгиланган. Аёлга нисбатан қўлланган шахсий кафиллик тарзидаги эҳтиёт чораси ўзгартирилиб, у суд залида қамоққа олинган.