“Пушкин” бекатидан ТТЗгача ерусти ва ерости метро линияси тушиши маълум қилинди

Транспорт вазири Илҳом Маҳкамовнинг сўзларига кўра, дастлаб ерусти метро бекатлари қурилади. “Пушкин”дан “Салар” темирйўл станциясигача траволатор орқали ёпиқ ўтиш йўли қилинади. Сўнгра ерусти метроси электропоезд йўналиши бўйлаб ҳаракатланиб, Акушерлик ва гинекология институти томонга бурилишдан еростига тушиши режа қилинган.

Тошкент метрополитенида ТТЗ даҳасигача йўл тортилиб, 10 та бекат қурилади. Бу ҳақда президент Шавкат Мирзиёев 20 март куни Тошкент шаҳрида амалга оширилаётган қурилиш ва ободонлаштириш ишлари билан танишув вақтида маълум қилди.

Gazeta.uz'нинг Транспорт вазири Илҳом Маҳкамовга таяниб ёзишича, “Пушкин” метро бекатидан ТТЗ массивигача бўлган метро линияси қисман ер устидан, қисман эса ер остидан ўтади.

Таъкидланишича, лойиҳа “Салар” темирйўл станциясидан Акушерлик ва гинекология институтига қадар электропоезд йўналиши бўйлаб (“Шаҳриобод” бекати орқали “Экобозор”гача) 5,5 км узунликдаги ерусти метросини барпо этишни кўзда тутади. Метро линияси автомобил йўлини кесиб ўтадиган 4 та жойда туннел қуриш режалаштирилган.

“Пушкин” метро бекатидан “Салар” темирйўл бекатигача траволатор орқали ёпиқ ўтиш йўли бўлади. Сўнгра ерусти метроси электропоезд йўналиши бўйлаб ҳаракатланиб, Акушерлик ва гинекология институти томонга бурилиш жойида аста-секин ер остига тушади. Бу биринчи ерусти метроси бўлади. Бугун биз президентдан лойиҳани батафсил ишлаб чиқишни бошлаш тўғрисида кўрсатма олдик. Халқаро маслаҳатчиларни жалб этамиз. Лойиҳалаш жараёни 1−1,5 ой давом этади”, — дея маълум қилган вазир Gazeta.uzʼга.

Кейинчалик ерусти линияси “Ашхобод” боғи орқали Кичик ҳалқа автомобил йўли бўйлаб “Тошкент” метро бекатигача (Шимолий вокзал) қўшимча 4 кмга узайтирилиши мумкин.

Шунингдек, вазир мазкур лойиҳа Тошкент шаҳрининг бош режасини инобатга олган ҳолда ишлаб чиқилганини таъкидлаган. Йўналиш янги турар жой бинолари ва мавзеларини қуриш билан реновация дастури режалаштирилган ҳудудлардан ўтади.

Умумий узунлиги 10,8 км бўлган янги метро линиясида кунига 85 минг йўловчи ташилиши, бир томонга бориш вақти 17 дақиқани, поездлар орасидаги интервал эса тахминан 6 дақиқани ташкил этиши кутилмоқда.

Ҳисоб-китобларга кўра, бугунги кунда Тошкентга Қибрай ва ТТЗ томонидан 194 мингга яқин киши, хусусан, 44 минг нафари автобус, микроавтобус ва Damas, 47 минг нафари енгил автомобилларда кириб келади. Янги метро линияси кўчалардаги, шунингдек, “Буюк ипак йўли” метро бекатларидаги юкламани қисман камайтириши кўзда тутилган.

Эслатиб ўтамиз, ТТЗ даҳасигача метро линияси қурилиши ҳақидаги дастлабки гаплар 2017 йилда “Тошкент метрополитени”нинг ўша вақтдаги раҳбари Ойбек Худойқулов айтганди.

Худойқулов 2030 йилгача метрополитенда “Беруний” бекатидан Қорақамишгача иккита бекат, “Буюк ипак йўли” бекатидан ТТЗгача учта бекат ҳамда “Мингўрик” бекатидан Жанубий вокзалгача бешта бекат қурилишини маълум қилганди.

Кейин лойиҳа 2021 йилда яна кун тартибига қайтиб, унинг лойиҳаси давлат раҳбарига тақдим қилинганди. Лойиҳага кўра, ерости линияси ётқизишнинг иккита – Мирзо Улуғбек кўчаси ёки Буюк ипак йўли кўчаси вариантлари кўриб чиқилаётганди.