Шавкат Мирзиёев Бектемирдаги янги боғга кўчат экди

Шавкат Мирзиёев Бектемир туманидаги янги боғга давлат ташкилотлари ва жамоатчилик вакиллари билан бирга кўчат экди, деб хабар беради Президент матбуот хизмати.

Қайд этилишича, Ийкота, Мажнунтол, Зилола, Роҳат ва Иқбол маҳаллалари орасидаги бу ҳудуд аввал қаровсиз жой бўлган. Уч гектарлик ҳудудга ўрмон концепцияси асосида 3 минг туп дарахт ва бута кўчатлари экилган. Уларнинг суғорилиши ва парваришига масъуллар бириктирилган.

Шунингдек, маҳалла фаоллари, нуронийлар ва ёшлар билан самимий мулоқот бўлди. Давлат раҳбари жамоатчилик вакилларига ушбу хайрли ташаббусга ҳисса қўшаётгани учун миннатдорлик билдирди. Барчани кириб келаётган Наврўз байрами билан табриклади.

Президент фармойиши билан эълон қилинган долзарб бир ойлик доирасида маҳаллаларда деҳқончилик ва ободонлаштириш ишлари сафарбарлик билан олиб борилмоқда. Баҳорда 125 миллион туп кўчат экилиши мўлжалланган. Бунда экин жойларини тўғри танлаш, суғоришни яхшилашга алоҳида эътибор қаратилмоқда.

«Атроф-муҳитни асраш ва «яшил иқтисодиёт» йили давлат дастурига мувофиқ, бу йил кўчатчиликка ихтисослашган 18 та ўрмон хўжалиги ташкил қилинади. Уларда «илм-лойиҳа-амалиёт» тамойили асосида генетик селекция ишлари кучайтирилиб, плантациялар кенгайтирилади. «Яшил олам» платформаси ишга туширилиб, кўчатларни онлайн сотиб олиш йўлга қўйилади.