Ажрашган жуфтликларга ҳиссиётларни унутиш учун 8 йил керак — олимлар

Иллинойс университети психологлари олиб борган тадқиқотга кўра, одамларга собиқ жуфтларига нисбатан ҳиссий боғлиқликдан тўлиқ халос бўлиш учун ўртача 8 йил вақт талаб этилади. Ушбу натижалар Psychology Today нашрида эълон қилинди.

Тадқиқотда 328 нафар катта ёшли инсон иштирок этган. Уларнинг ўртача ёши 30 бўлиб, иштирокчиларнинг 57 фоизи аёллардан иборат бўлган. Барча қатнашчилар камида икки йил давом этган ва якунланган романтик муносабатларни бошдан кечирган. Уларнинг ўртача муносабатлари 4,6 йил давом этган бўлиб, ўртача 5 йил олдин якунланган.

Иштирокчиларга собиқ жуфтлари ҳақидаги фикрлари ва ҳиссиётлари ҳақида саволлар берилган. Жумладан, улар собиқ жуфтлари билан вақт ўтказишни ёқтириш ёки улар билан ўзларини хавфсиз ҳис қилиш-қилмасликлари ҳақида сўзлаб беришган. Шунингдек, улар янги муносабатларга кирган-кирмаганликлари ва кимнинг ташаббуси билан ўзаро муносабатлар якунлангани ҳақида ҳам маълумот беришган.

Олимларнинг статистик таҳлилларига кўра, вақт ўтиши билан собиқ жуфтга бўлган ҳиссиётлар тўлиқ сўниб боради. Яъни, деярли барча одамлар вақт ўтиши билан собиқ жуфтларини севишни тўхтатадилар.

Бироқ, бу боғлиқликнинг ярмини йўқотиш учун ўртача 4,18 йил талаб этилади. Демак, тўлиқ унутиш 8 йил давом этади. Айрим иштирокчилар эса кўп йиллар ўтгач ҳам собиқ жуфтларига нисбатан бегоналарга қараганда кучлироқ ҳиссиётларни сақлаб қолгани кузатилган.

Тадқиқот яна шуни ҳам кўрсатганки, янги муносабатлар ёки иштирокчининг жинси ҳиссиётларнинг тез сўнишини кескин тезлаштирмайди. Бунга энг катта таъсир кўрсатувчи омил собиқ жуфт билан мулоқотни давом эттириш бўлган. Қанчалик кўп алоқа сақланса, боғлиқлик шунчалик узоқ давом этган.

Шунингдек, ташвишга кўмилиб юрадиганлар собиқ жуфтларига узоқроқ боғланиб қолган. Эътиборли жиҳати шундаки, собиқ жуфтдан фарзандлар бўлиши эмоционал боғлиқликни кучайтирган, бироқ бу боғлиқлик фарзандсиз жуфтликларга қараганда тезроқ йўқолган.