Украина баъзи шартларда Россияга қўйилган санкциялар олиб ташланишига рози

Бу аввало хавфсизликни таъминлашга ёрдам бериши керак.

Фото: AP

Украина босқини туфайли Ғарбнинг Россияга қўйган санкциялари бекор қилиниши мумкин, агар бу Украина хавфсизлигини таъминлашга ёрдам берса. Бу ҳақда Украина президентининг санкциялар бўйича вакили Владислав Власюк Politico нашрига маълум қилди.

Унинг сўзларига кўра, хорижий бизнеснинг Россия бозорига қайтиши «вақт масаласидир». Аммо бу тегишли шароитларда содир бўлиши керак. Киритилган чекловлар «фақат жазо эмас», деди Власюк. Санкцияларнинг мақсади, бошқа нарсалар қатори, «Россияни ўз тажовузкорлигини тўхтатишга ундаш ва уни мустаҳкам тинчлик бўйича битим тузишга мажбур қилиш».

Айни пайтда, украиналик расмийнинг сўзларига кўра, келишувларга қандай санкциялар киритилиши мумкинлиги ҳақида гапиришга ҳали эрта. «Ҳозир биз Россия аввало бу йўналишда муҳим қадамлар ташлашига ишонч ҳосил қилмоқчимиз, кейин эса санкцияларни бекор қилиш ҳақида гаплашиш мумкин», деди Власюк.

Унинг айтишича, Россия вакиллари аллақачон маълум чекловларни олиб ташлаш мумкинми ёки йўқлигини аниқлашга ҳаракат қилмоқда. «Бу бизга қайси санкциялар энг оғриқли эканини яхшироқ тушуниш имконини беради. <…> Биз бу тутқичдан оқилона фойдаланишимиз керак», деб қўшимча қилди у.

«Украина хавфсизлигини кафолатлайдиган ҳар қандай узоқ муддатли келишувнинг бир қисми сифатида Киев ўз халқи учун адолат излайди, эҳтимол украиналиклар учун товон пулини талаб қилади», деди Власюк.

Ғарб нашрларининг ёзишича, АҚШ президенти Доналд Трампнинг маслаҳатчилари аллақачон Россияга қарши санкцияларни юмшатиш вариантлари устида ишламоқда. Чекловларни юмшатишнинг асосий шарти Москванинг Киев билан тинчлик битимини тузишга розилигидир. Рад этилса, Трамп Россияга «кенг кўламли санкциялар» билан таҳдид қилди.

Россия ва Украина ўртасида тинчлик ўрнатиш йўлидаги дастлабки қадамлар доирасида Қўшма Штатлар томонларга фронтда 30 кунлик оташкесим жорий этишни таклиф қилди. Украина ҳукумати бу таклифни қўллаб-қувватлади. Владимир Путин, умуман олганда, Россия АҚШ ташаббусини қўллаб-қувватлашини, бироқ «нюанслар» ва муҳокама қилишни талаб қиладиган масалалар борлигини айтди.

АҚШ Путиннинг бу баёнотини «умидли, аммо тўлиқ эмас» деб атади. Украина президенти Владимир Зеленский Россиянинг реакциясини «манипуляция» ва рад этишга тайёрланиш деб атади. У Россияга қарши янги санкциялар жорий этишга чақирди.

#Украина #Россия #санкциялар