Хитой, Россия ва Эрон барча ноқонуний санкцияларни бекор қилишга чақирди

Хитой, Россия ва Эрон биргаликда АҚШ ва бошқа давлатларни Теҳронга қарши ядровий дастури туфайли жорий этилган санкцияларни бекор қилишга чақирди. Бу ҳақда 14 март, жума куни Пекинда бўлиб ўтган уч томонлама учрашув якунлари бўйича тегишли баёнот берилди. Музокараларда Хитой ташқи ишлар вазири ўринбосари Ма Чжаоху, Россия Федерацияси ташқи ишлар вазири ўринбосари Сергей Рябков ва Эрон ташқи ишлар вазири ўринбосари Казем Ғариб-Абадий иштирок этди.

Россия Ташқи ишлар вазирлиги сайтида чоп этилган қўшма баёнотда Хитой, Россия ва Эрон Эрон ядро дастури бўйича «чуқур муҳокамалар» ўтказгани ва барча «ноқонуний бир томонлама санкциялар»ни тўхтатиш зарурлигини таъкидлаган. Уч мамлакат сиёсий ва дипломатик алоқалар, шунингдек, манфаатларга ўзаро ҳурматга асосланган мулоқот вазиятни ҳал қилишнинг «ягона ҳаётий ва самарали варианти» бўлиб қолаётганини яна бир бор тасдиқлади.

Учрашув иштирокчилари, шунингдек, 2015 йилда келишилган Эрон ядровий битимини ратификация қилган БМТ Хавфсизлик Кенгашининг 2231-резолюциясини амалга ошириш муҳимлигини таъкидладилар. Улар Эрон ядровий муаммоси атрофида вазиятнинг кескинлашувига олиб келадиган ҳар қандай ҳаракатлардан тийилишга ва дипломатик саъй-ҳаракатлар учун «қулай муҳит ва шарт-шароит» яратишга чақирди.

Бундан ташқари, уч давлат Ядро қуролини тарқатмаслик тўғрисидаги шартномага риоя қилиш муҳимлигини қайд этди. Хитой ва Россия «Эроннинг ядровий дастури соф тинч мақсадларга қаратилганлиги ва ядровий қурол ишлаб чиқаришни мақсад қилгани йўқлигини тасдиқлашини олқишлади», дейилади баёнотда. Йиғилиш иштирокчилари, шунингдек, барча мамлакатларни Атом энергияси бўйича халқаро агентлик фаолиятига тўсқинлик қилмасликка чақирди.