Перуда пул ўғирлаган маймун полиция томонидан қўлга олинди

Маймун пулларни томлар, дарахтлар ва ҳатто электр симларига сочиб ташлаган.

Фото: AP

Перуда полиция бир нечта уйга зарар етказган ғайриоддий қоидабузарни қўлга олди. Ходимлар тартибсизлик қилиб, пул ўғирлаган қочқин маймунни ушлади. Бу ҳақда Перу ўрмон хўжалиги ва ёввойи табиат миллий хизмати хабар берди.

Ика шаҳри аҳолиси полицияга мурожаат қилиб, томлар, дарахтлар ва ҳатто электр симларида сочилиб ётган пулларни кўрганини хабар қилишган. Кейин маълум бўлишича, ўғрилик ва тартибсизликларни эгасидан қочиб кетган уй маймуни содир этган.

Гумонланувчи маймун (қора бошли эркак капутсин) бир нечта уйга кириб, хоналарни остин-устун қилган. Охир-оқибат “жиноятчи” қўлга олиниб, дарахтдан туширилди.

Воқеани ўрганиш давомида расмийлар жонивор маҳаллий эмаслигини, балки Амазония ҳудудларида кенг тарқалган турга мансублигини аниқлади. Маймуннинг белидаги арқон излари унинг уйда боқилганидан далолат берарди.

Расмийларнинг айтишича, ҳайвон ҳаддан ташқари қўлга ўрганиб қолгани туфайли полиция уни ёввойи табиатга қўйиб юборишга журъат этмаган. Ҳозирда маймун Ика шаҳридаги маҳаллий ҳайвонот боғида сақланмоқда. Жонивор у ерда қоладими ёки бошқа қўриқхонага кўчириладими, ҳозирча номаълум.

#Перу #полиция #маймун #ўғрилик