Трамп: АҚШ музокарачилари Москвага жўнаб кетди

Киев билан ўт очишни тўхтатиш бўйича келишувга эришгач, америкалик музокарачилар маслаҳатлашиш учун аллақачон Москвага жўнаб кетишган. 12 март, чоршанба куни Вашингтонда Ирландия бош вазири Михол Мартин билан учрашув чоғида АҚШ президенти Доналд Трамп журналистларга «ҳозирда улар у ерга йўл олишмоқда», деди.

Трамп Россия президенти Владимир Путин Украинада ўт очишни тўхтатишга рози бўлишига «умид қилишини» айтди. Журналистларнинг Москвага нисбатан эҳтимолий босим чоралари ҳақида сўраганида, Америка етакчиси шундай жавоб берди: «Бундай ишлар ёқимсиз бўлади. Молиявий жиҳатдан мен Россия учун жуда ёмон бўладиган ишни қилишим мумкин. Мен буни қилишни хоҳламайман, чунки мен тинчликни хоҳлайман».

Ўз навбатида, АҚШ вице-президенти Жей Ди Вэнс АҚШ ва Россия вакиллари ўртасида фаол музокаралар олиб борилаётганини таъкидлади. У Украинадаги урушни тугатиш бўйича дипломатик саъй-ҳаракатларнинг илк натижаларини олқишлади. «Биз ҳозир жуда яхши ҳолатдамиз деб ўйлаймиз: украиналиклар ўт очишни тўхтатишга рози бўлишди, энди биз Россияни ҳам бунга рози бўлишга кўндира оламизми ёки йўқми, шуни кўрамиз», — деди у.

Зеленский: Украина ўт очишни тўхтатиш таклифига рози

Украина АҚШнинг 30 кунлик оташкесим ўрнатиш таклифига рози бўлди, энди Вашингтон Россияни ишонтириши керак. Бу ҳақда Украина президенти Володимир Зеленский 11 март куни кечки нутқида Киев ва Вашингтон вакиллари ўртасидаги музокаралар натижаларини шарҳлар экан, айтиб ўтди.

Унга кўра, Саудия Арабистонидаги музокараларда Киев учта таклифни илгари сурган: «осмонда сукунат», «денгизда сукунат» ва «асирларни озод қилиш». Бунга жавобан, Зеленский таъкидлаганидек, Америка томони олдинга биринчи қадамни қўйишни таклиф қилди ва 30 кун давомида сувда, ҳавода ва бутун фронт чизиғи бўйлаб тўлиқ ўт очишни тўхтатиш режимини ўрнатишга ҳаракат қилади. «Украина бу таклифни қабул қилмоқда, биз буни ижобий деб ҳисоблаймиз, биз шундай қадам ташлашга тайёрмиз. АҚШ Россияни бунга ишонтириши керак. Яъни, биз розимиз, агар руслар рози бўлса сукунат ҳукм суради», — деди Украина президенти.